Zawngrengtea serthlum veng ang…

Sawrkar thuchhuahin a tarlan danin, January ni 28 khan Tuirial luiah Tuirial branch YMA chuan bomb hmangin sangha an man tih finfiah a ni a. Hemi chungchangah hian Tuirial branch YMA hruaitute chu nimin January ni 29 khan Director, Fisheries department hmaah an inlan a, Mizoram Fisheries Act 2002 Section 10 – Compounding of offences tlawh chhanin pawisa chawitir an nih bakah tun hnuah hetiang thil hi thleng tawh lo tur leh Tuiriala sangha man leh zawrh kawngah pawh Mizoram Fisheries Acts-in a phut anga mumal taka kalpui a nih theih nan theihtawpa Fisheries department thawhpui tura intiamkamtir an ni a.
An chhuinaah Tuirial Branch YMA hian Mizoram Fisheries Act, 2002 Section 6 (1) (a) – ‘Geletine/ explosives hmanga sangha hman phal loh’ tih chu an bawhchhe ngei tih finfiah a ni.
A hmuna department mi leh sate an thlenthlak hian sangha tam zawk lo hralh zawh tawh a ni a, a bang awm ang ang te man sak nghal niin laboratory-a enfiah a nih hnuah danin a phut angin hal ral a ni.
Kan ram lui-a nungchate an lo inthlahpun zel theih nan leh awmze nei leh tha zawka humhalh a nih theih nan Fisheries Department leh Central YMA te chuan kum 2021 atang khan kum hnih danah te Thawhhona Thuthlung an lo ziak tawh thin a. Thuthlung an ziah hnuhnun ber kha January ni 30, 2024 a ni a, vawiin January ni 30, 2026 hi a kum hnihna tur chiah a ni. Thuthlung a ral hma ni khat la awmah, Tuirial branch YMA hian an humhalh mek luia nungchate, phalna nei lovin bomb hmangin an lo man a, anmahni pawhin man an tawk zui ve nghal a. Zawngrengtea serthlum veng kan iang zo ta a ni ber e.
Mizoram Fisheries Act, 2002 Section 6 (1) (a) an bawhchhiat rual hian, dan bawhchhiate chunga hremna lek dan tur chu, Mizoram Fisheries Act, 2002 Section 6 (2)-ah heti hian tarlan a ni bawk a: Any person who violates any prohibitory order issued under sub-section (1) shall, on conviction, be punished with imprisonment for a term which may extend to six months or with fine which may extend to two thousand five hundred rupees or with both, tiin.
Mizoram Fisheries Act, 2002 leh Mizoram Fisheries Rules, 2019 hian phalna nei loa luidung nungchate man leh an chenna hmun tibuai leh ti bawlhhlawh zawnga hmalak a khap tlat a. YMA leh Fisheries thawhhona hmasa lamah khan Mizoram Fisheries Act leh Rules bawhchhia mi 27 te manchhuah niin hremna pek an lo ni tawh a ni.
YMA Khawmpui lian Biate a neihah khan luidung humhalh tha YMA Branch leh Group pathum ve ve te hnenah lawmman hlan a lo ni tawh bawk a nih kha.
Aw le, luidung humhalhnaah, ‘Zawngrengtea serthlum veng kan iang e’ kan han ti tak na a, hei hi Mizoram pumah hian a thleng mek reng niin a lang. Ram leh hnam humhalh a, hmasawnna hna thawk tura kan beiseite zingah hian, Zawngrengtea serthlum veng ang chauh hi engzat tak awm ang maw? A vengtu berin an ei melh melh reng chuan, huan neitu chanpual tur chu a beitham viau dawn tih a hriat reng mai! Vengtu tur ven lehchhawn ngaia awm hi engtin nge kan tih reh dawn tak ni?