Zemabawk BC chuan tualchhung basketball boruak rawn chawk tho lehin, ram pawna a awm avanga club khelhna nei lo (free man) Lalhnehpuia Chhakchhuak chu tun season chhung an hnena khel turin an ziak lut fel leh ta.
Pu Aldrin Lallawmzuala leh Dr. Lalrinsangi te fapa neihchhun, he zarkawt tlangval hian zirna avangin Mizoram chhungah hun a hmang tam thei lo va, heti chung hian he player fit 6’2 zeta sang hian theihna sang tak a neih hi tualchhung basketball hrechiang bertu te zinga mi, Zemabawk BC puipa lam chuan USA atanga a rawn let rualin an club thuam chak nan an lo chelh ding nghal chat.
The Aizawl Post Hoops Mania chuan ‘Murvate’ tia a lo koh thin, Hnehpuia hian zirna leh infiamna hi suihzawm chiatin, a chanchin hi kum 2025, October ni 25 a lehkhabu tihchhuah ‘1984’ ah khan tarlan a ni tawh nghe nghe.
Hnehpuia, Naua tia koh duat hian, “Bsc. Psychology ka zawh hnuah Registered Behavior Technician niin, autism naupang therapy ka pe thin a; mahse, masters ka tih zawm dawn avangin USA ka chhuah san a ni.
Masters hi German Sports University (World ranking -10) ah ‘masters in psychology of sports and exercise’ ka tih zawm dawn. Semester break hi February thla chawhnu lam atanga March thla a ni dawn a, chumi chawlh lai chuan Aizawlah rawn haw theih beiseiin, a tum khat nan contract ka sign ve ta.
Naua hian sawi chhunzawmin, “ Club-ah hian contract ka sign ngai lo va, chuvangin season a lo thar apiangin ‘free man ‘ka ni thin. Free man ka nih vang leh tun tum chu MSL khelh a beisei awm avangin contract hi ka sign ta a ni. Zemabawk BC family ten hun tha min pe hi ka lawm hle” tiin season liam taa Mission Veng Hotshots player, MSL khel ta lo hian kan zawhna a chhang.
Kum 2021 khan Chicago, USA a North Park University-ah partial scholarship hmua college zawm Hnehpuia hian, North Park University Men’s Basketball team-ah a tel zui phak ve nghal mai a, a khelhna hi NCAA division III a ni pha nghe nghe.
Mizo top sports star Remsiami, Lianzuala leh Apuia te ang bawka lehkhabu ngaina pha ngat Naua hian, Lord of the rings, J.R.R Tolkien ziah kha a duh ber. Naua nu Pi Masangi hi ‘Promotional of reading culture among the Mizo youth’ hmalakna, MYC hnuaia lehkhabu tha chhiar hlawk zia phur taka tlangaupuitu a ni nghe nghe.
A khelhna club thar Zemabawk BC tan MSL champion nomawi lakpui thei tak maw – duhsakna kan hlan e.
Zemabawk BC An Che Leh Ta! Hnehpuia (Murvate) is back..
