Daily Newspaper

THLASIK RIM NAM

39

-Mahmuaka Chhakchhuak

A tak hmuh tur awm mang si lo leh kan sawi uar fu bawk si he Thlasik rim hi hnara hriat theih a ni lo a, mita hmuh pawh a theih hek loh. A uar zualte phei hi chuan October thla vel atang khan tawngkam chhehremna hmanraw pawimawh tak atan an lo hmang daih tawh mai a, a hunlai na na na hi chuan nupa kar atanga vangtlang leh kohhran upa zingah thleng pawh he tawngkam hi kan sawi zin pawl tak a ni awm e. A taka hmuh theih awmchhun chu naupang biang chat te, tlangsam leh tlaizawng lo par te hi a ni mai awm a. Chutih rual chuan kumtluana hnathawh rah seng a lo hun chho tan mai bawk bakah ramsa leh sava te ngei pawh an lo thau tan ta bawk a, zing nilum ai a lo nuam ta riaute pawh hi Thlasik rim nam tia kan sawi hmuh theih awmchhun chu a ni mai lawng maw le? Thlasik rim nam kan tih ang hian nipui rim a nam kan ti ngai hauh lo a, favang boruak rawn thaw te ngei pawh chu a rimnam zawnga sawi a ni ngai hek lo. Thlasik rim zet zawng a rim tui leh rim chhiat sawih theih ni bawk si lo chung hian a lo na bik a ni ang a, a hunlai hi chuan kan sawi tam ber pawl a nih hi.

Lungleng mi tan hla phuahna hun remchang tak turin boruak a thian that mai bakah romei a la zam chuk te chu hla thar pianchhuahna atana thil pawimawh tak an nih ngei te a rinawm. Zan lamah lah chuan chunglamah dip daltu nei hauh loin Arsi alo lang pe tuar bawk a, thla en lai ngat phei chuan zan boruak hi a nuam danglam riau mai a, inchhunga puan lum tha tak nena awm aiin pawn khawvawt tak kara meilum ai chu a nuam daih zawkin titi pawh a muk duh zawk a. Kum upa lam tawhte tan ngat phei chu he thlasik rim nam hian a awm mai mai tir thei hauhin a rinawm loh a, tunhma lamah te kha chuan thlawhhma rah seng zawh tawh bawk si chuan kut sa zawnga ramchhuah a chakawm viauin a rinawm. Silai nei tan silai tuaifaina hun tak tur a ni bawk a, thangkam mi tan lah rappui sanga Behai phawrh hun tak tur a ni bawk.

Keini, lungleng mi pawh ni ve lem lo a, khawtlang lunglen pawh la nei chhin eih lo tan chuan Thlasik rim nam hi urhsun taka sawi chiam pawh lo tum ve mah ila sawi dan tur kan haihchham tlat thung a, kan rilruah chuan lal piang lawmna lam leh mas thawmhnaw thar neih emaw deuh chauh chu a ni mai. Kum 12 rual vel kan nih laia krismas pheikhawk atana ball boot ngat kan unau thuma kan han bun thap thap kha vawiin thleng hian ka la theihnghilh thei lo. Football ngaina pawh kan nih loh unau hlawm tehlul nena khatia ball boot ngat mai kristmas pheikhawka han hman kha a chhan ka hrethiam mai lo. Kan inkhawm bang hi Biak In atangin kan unau chuan kan inkai a, kawngpuia kan kal hian a ri thap thap thin si a tiin kawngsirah kan kal dal dal thin. Nimahsela krismas boruak a lo zawh tawh thungah chuan ka ball boot chu ball petna atan min hawh sak ngun hle thung a, thla khatah cheng 5 te hian min hawh sak a, tlo te pawh kha a tlo viauin ka hre nghe nghe.

Kan khawvel hman dan hi a inang lo hlawm ngawtin a rinawm a, a thenin zan mut a nuam a, muttui a awl te an tih laiin a thente chuan zan reh tak kara hla phuah emaw thu tha tak tak ziahna hun atan he thlasik boruak vawt nuam tak hi an hmang tangkai ngeiin a rinawm. Sumdawng mite tan lah zan khaw tairek thleng thlenga menna tur a tam zual ngei ang a, meihawl zuar tan te, thawmhnaw zuar tan te mai bakah sumdawnna dang reng reng khawih mite tan chuan hunpui a lo thlen mai tawh dawn avangin mawngvawmba ang maia phet sekna hun tak tawh tur a ni bawk. Chhungkaw tinin hlim taka kan hman theuh theihna atana rilru hmunkhata sum lakluhna lama kan inpek hun tak pawh a ni a, zing khaw en hma atanga nghawngkawl nena bazaar lama inphur lawp lawp pawh he hunah kher hi chuan hmuh tur an tam ngei bawk ang. Chung zawng zawng chuan thlasik rim nam hi a hrilhfiah vek pawh ti ila a sual kher awm chuang lo e.

Khawhar mi tan leh lungleng mi tan ngei pawh nipui leh hun dang ai zawngin he thlasik rim nam hian a mi deh a nat zawk ngei a rinawm a. Pangngai taka midangin tui taka khupruh pelhsawlh phunga an mut laiin thawm bengchhen hlauh tak chunga kawl rawn en tan dek dek thlenga lehkhapuan-a eng eng emaw an la ziak nuap nuap an nih pawhin thlasik rim namin a ken tel vekah ngai ila. Zai ring ngam si lo a tukverh bula tingtang nena lunglen hla an sa a nih pawhin a boruakin a zir em vangin an demawm hauh chuang loh ang. Thlasik boruak zet hi chuan ken tel a ngah a, hriatthiam vek theih si loh hian mihringah thuk takin thuneih a rawn tum tlat bawk te hi thenkhatte tan chuan mittui kochhuak tu mai a ni bawk si. A thinrim thlak a, a huatthlalaawm bawk a, chutih rualin a ngainatawm viau lawi ang bawk a. A awmzia hre lo leh ngaihsakna nei lo tih hriat reng renga naupang tualchai ho te lah chuan taksa leh thawmhnaw balh pawisa miah loin vut zingah an lo tal mai mai te chu a lehlam kawnga ngaihtuah phei chuan awh-awm tak an ni zawk awm e. Tute emaw tan erawh chuan he Thlasik boruak hi hmangaih kaltate hriatchhuah tirtu a nih thin avangin thil lawmawm lama chhiar theih a ni hauh loin a rinawm. Zan reh tawh lama an thlana va tah hawm hawm chauh chu tihtheih awmchhun a nih mai tawh bawk si avangin khuma mutchhuak lo chunga mut luih te alo ngaih phah zawk mai a, pangti kham leh leh nen a hrehawm duh viau ngei ang. Suangtuahna khawvelah an cheng a, chu an suangtuahna lah chu hriatreng theih a ni bawk loh mai bakah reiloteah a ral leh mai thin bawk si a. He thlasik rim nam zet zawng mihring nunah thu ava sawi nasa bik kher tak em!

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy