Election Commission ruahman angin vawiin – December 4-a Mizoram MLA inthlanpuia vote chhiar turin engkim peihfel a ni tawh. Vote hi zing dar 8.00 ah chhiar tan a ni anga, duty turte chu an awmna tur hmunah zing dar 7.00 a thleng vek tura tih an ni. Zing dar 5.00 ah duty turte siamremna hnuhnung, final randomisation neih a ni ang.
Postal ballot atangin vote chhiar bul tan a ni anga, EVM-a vote tla chhiar zui tura ruahmanna a ni. Kumin hian ECI ruahmanin vote tla chhiarte mipui nawlpuiin an hriat zung zung theih nan internet-a data upload turin ENCORE (Enabling Communication on Real-Time Environment) portal siam a ni a, district tinah a thutchilh tur din a ni.
Vote chhiarnaah hian returning officer, assistant returning officer, counting supervisor, counting assistant, micro observer leh hna dang thawktu mi 2780 vel an awm a. Polling station tina presiding officer 1276 an awm bawk. Venhim hna thawktuten Counting Centre tinah thuam thumin venhim hna an thawk dawn a ni.
Vote tla chhiar tur hian counting centre 13-ah assembly constituency tin tan counting hall pakhat zel awmin, a vaiin counting hall 40 a awm a. Heng counting hall ah hian counting table 396 awmin, vote chhiarna dawhkan tinah hian counting supervisor pakhat, counting assistant pakhat leh micro observer pakhat zel an awm dawn a, vote chhiarna hmun hi ECI ruat observer 40-in constituency tinah a malin an vil dawn a ni.
Counting table awm zat leh vote chhiar tur polling station awm zatin chhiar hun (round) a hril dawn a. Round 5-a chhiar zawh tur bial 7 a awm a, round 4-a chhiar zawh tur bial 12, round 3-a chhiar zawh tum bial 18 leh round 2-a chhiar zawh tur bial 3 a awm a ni.
Zing dar 8-ah chhiar tan dawn
