By heart system ringawt ni loa, zirlaiten an zirlai an hriatchian leh hriatchian loh hriatna tak tak turin exam zawhna an uar chho telh telh dawn tih Mizoram Board of School Education chairman JH Zoremthanga chuan a sawi.
Thawhlehnia HSLC 2024 exam result an tihchhuah hnua thuthar thehdarhtuten an kawmnaah MBSE chairman chuan, naupangten an zirlai leh zirlaibu an hriatchian tak tak dan hre turin exam zawhna lam uar chhoh zel tum tawh tih a sawi a. Hetiang hi tun sawrkar pawhin education kalphunga kalpui a tum dan a ni tih a sawi.
“Syllabus lamah chuan CBSE-te nen kan inang tlang a, examination pattern-ah erawh hmasawnna tur kan nei a, chumi lam hawi chuan Board-in ke a pen zel a ni,” a ti.
HOTS (Higher Order Thinking Skill) uar deuh deuh an tum rualin, Mizoram chu kan awmna a zir loh avang leh zirtirtu indaihlohna avangin duh anga hma lak chak theih a ni lo tih a sawi a. Zirlaite thiam loh chhan ber chu, a awmzia an hriat loh vang a nih tlangpui avangin ruahmanna an siam thar chuan a puih an ring tih a sawi.
Zirtirtu indaihlohna a nasa a, arts subject zirtirtu in a theih ang anga inzirchawpin science a zirtir ve mai a ngaihnate a awm a, naupang hnenah tuina tak tak leh thiamna tak tak nei turin a va pechhuak pha lo thin tih JH Zoremthanga hian a sawi. Hemi thlak tum hian MBSE chuan hma a la a, mathematics leh science bikah bi-lingual text book an siam a, nikum atangin class IX leh X tan Sap tawng leh Mizo tawngin an dah vek tih a sawi.
“Naupangin an chhiar a, thahnemngai taka hriat tuma an beih chuan, mahni tawng ngeiin an hre thei tawh dawn a, chu chuan a pui viau turah kan ngai. Chutihrualin naupangin an chhiar taimak leh taimak loah a innghat ang,” a ti.
Bi-lingual text book hi class XI leh XII tan pawh ruahman chhoh zel tum niin, class XII thleng chuan mahni tawngin mathematics leh science bik hi chu a awmzia an hriat theihna turin zirlaite pui turin Board-in hma a la tih a sawi a ni.
Kumin HSLC exam-ah dan bawhchhe zawnga exam-na atanga inhnawhchhuah ngai an awm loa, pass percentage-ah nikum aiin 2% velin a sang bawk chu an lawm hle tih MBSE chairman hian a sawi bawk.
Zirlai hriatchian leh hriatchian loh zawhna lam uar zel dawn – MBSE chairman
