Daily Newspaper

Zirlai pawlin CM leh HM bang turin ngen

25

Zirlai pawl pahnih – Mizo Zirlai Pawl leh Mizo Students’ Union chuan ramria buaina chungchanga Assam hmalak danah Mizoram chief minister leh Home minister chu an mawhphurhna hlen zo loah an ngai a, bang turin an duh tih an sawi.

MZP Gen. Hqrs thuchhuak chuan, Mizoram chhung Vairengte daia Assam police-ten ralthuam famkim inthuam a, Mizoram chhunga Mizo mipuite rikrapa buaina an siam chu thinurthlak a tih thu a sawi a. Mizoram IR camp luhchhuaha Assam police-ten an luah chhunzawm pawh mak a tiin, pawm a harsa hleah a ngai tih a sawi.

Assam miten Mizo mipuite tham lo taka an luhchilh leh Mizorama huangtau taka ralthuam nen an rawn che chu chhanlet ve a hun tawh takzetin a hria tih sawiin, ‘Ram humhalh kawnga Mizoram sawrkar hmalakna hi MZP chuan a duhkhawp lo takzet a. Mizoram sawrkarin Assam sawrkar a ngam lo a nih chuan, Mizo thalaite an che chhuak zel dawn a. Mizoram IR camp Vairengte ami hi Mizoram sawrkarin a rang thei ang bera a chhuhlet lo a nih chuan sawrkara mawhphurtu chief minister Zoramthanga leh Home minister Lalchamliana te chu an mawhphurhna hlen zo loah kan ngai a, bang ngam turin kan duh a ni,’ a ti.

MSU Gen. Hqrs chuan July 26-a Assam sawrkar chet dan chu thinrimthlak a ti takzet tih sawiin, ‘Mizoram leh Assam ramri chinfel loa awm reng hi MSU chuan pawi a ti a. Mizo mipui duhdan anga Mizoram sawrkar chu che thuai turin kan phut a. Ramri buaina hi an chingfel thei lo a nih chuan chief minister leh Home minister hi bang ngam turin kan ngen a ni,’ a ti.

Assam police-ten Mizo police-te camp an lak zawng zawng chu rang taka lalet nghal turin Mizoram sawrkar a ngen tih MSU hian sawiin, ‘Hei hi a thei lo a nih chuan zirlaite kan ram chin lalet turin kan pen chhuak dawn a ni tih Mizoram sawrkar kan hriattir nghal a. Kan boruakin buai lam a pan zual zel avangin Assam state chhunga Mizo awmte chu fimkhur turin MSU chuan a chah a, a bikin Silchar-a awmte chu an sahimna ngaihtuah turin a râwn a ni,’ a ti. Mizoram House leh Silchar Mission Compound-a venhimna tha tak dah turin Mizoram sawrkar an ngen tih a sawi bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy