Daily Newspaper

Zirlai ten private coaching-ah sum seng nasa

16

India ramah zirlai panga zinga pakhat zel chuan an zirnaah private coaching an la a, secondary level class 9 leh 10 ah zirlai pathum zinga pakhat zelin private coaching an la bawk.

Secondary leh Higher Secondary-ah zirna atana sum senah private coaching chuan 20% hial a hauh bawk a. State thenkhat, West Bengal angah te chuan zirlai ten school-a sum an sen aiin private coachinga an sum sen a tam zawk niin National Statistics Organisation’s (NSO) report chuan a tarlang.

School pangngai ang thovin heng coaching leh tuition class te hi Covid-19 pandemic avangin khar a ni a, mahse, tam tak te chuan online coaching class an pe thung.

September 21 atangin school te chu voluntary basis-in class 9 leh 10 te tan hawn tawh tur a nih thu Health Ministry in guidelines Thawhlehnia tihchhuahah a tarlang a. Mahse, zirlaite thlaruk chhung zirlai chawl tawh te chuan an hloh nei let leh turin coaching class an behchhan fur rin a ni thung.

National Sample Survey 75th round June 2017 leh July 2018 inkar chhunga neihah in tin te chu zirna kaihhnawiha consumption an neih zirchian a ni a. Final report hi tun hnaiah phochhuah niin chutah chuan zirlai 19.8% pre-primary atanga graduate zirlai thlengin private coaching la an ni deuh vek a. Class 9 leh 10 zirlai te board exam leh admission test hmachhawn turteah phei chuan 30% laiin an la a ni.

Khawpuia awm secondary students te leh khawsak nuam deuh te chuan private coaching man sang tak an la a. Khawpui mipa naupang 52% te chuan coaching an la a, thingtlang leh scheduled tribe zirlaite zingah 13.7% chauhin coaching an la a ni.

Heng coaching-a sum sen hi a tam hle a. Secondary school zirlai tena zirna a sum an sen hi kum khatah Rs 9,013 vela chawhrual a ni a, heta tanga Rs 4,078 chu regular school fee a ni. Rs 1,632, 18% vel chu private coaching atana hman a ni a. Higher secondary school zirlaite chuan zirna atana an sum sen atangin Rs 2,500, 18% vel private coaching atan an hmang thung.

India khawchhak lamah private coaching uar nasat zual niin West Bengal-ah chuan zirlai ten kum khatah private coaching atan Rs 3,769 vel an seng anga ngaih a ni.

(THE AIZAWL POST – Ramchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy