Sawrkar school-a lutte tana a thlawna zirlaibu sem thin, academic session tan tawh hnu tun thlengin la thleng kim lo a awm a. Mizo Zirlai Pawl chuan kumtin maia zirlaibu thleng kim lo buaina thleng ziah chu zirlaite ngaihsak tawk lohnaah an ngai tih an sawi.
MZP Gen. Hqrs. hruaitute chuan Zirtawpni khan Printing & Stationery department press-ah kalin zirlaibu thlen tawh dan a hmunah an enfiah a. Zirlaibu tam zawk thleng tawhin, a la thleng lo pawh kawng lakah a rawn kal mek tih an finfiah.
A mamawhtute hnen a thlen thuai theih nan enzui zel an tum tih MZP chuan sawiin, ‘Kumtina hetiang buaina thleng ziah hriatthiam a har a. Zirlaite ngaihsak tawk loh naah kan ngai. Kumtin buaina ni chunga chinfel tumna tak tak awm lo thin hi, sawrkar thar hian ruahmanna fel tak siam nghal se kan duh,’ a ti.
Zirlaibu chhut nana sawrkarin cheng nuai 100 budget-a a dah chu lawmawm a tih thu a sawi a. Hei hian zirlaibu chhut nana sum lama harsatna a tihziaawm ngei an rin rualin, kum lokal zel turah hetiang buaina a thleng leh a nih chuan na taka hma an lak tur thu a sawi.
Tunhnaia ramri buaina laia Assam Police-in an camp kalkawng an sial tha chu a hmunah an en tih MZP hian sawiin, sawrkar thuneitute hnena an ngen angin Kolasib DC leh Cachar DC inbia-in, Assam-in an kawng laih mek titawp tura hrilh an ni chu lawmawm an tih thu an sawi. Mizoram ramri venghimtu sipai camp kalpawhna kawng chhe lutuk leh kalpawh zung zung harsa lutuk chu tha taka siam thuai turin sawrkar a ngen tih a sawi bawk.
Zirlaibu a la thleng kim lo
