Academic session thar tan a nih daih tawh laiin, class I-VIII zirlaiten zirlaibu an la changkim thei lo tih AAP Mizoram chuan an sawi a. Zirlaibu indaihlohna hi chingfel thuai turin sawrkar an phut tih an sawi.
AAP Mizoram president Andrew Lalremkima Pachuau chuan 2024-2025 academic session chu sawrkarin kumin April 5-a tan tura sikul zawng zawng a tih laiin, May 10 thleng khan class I-VIII zirlaiten zirlaibu an la changkim thei lo tih a sawi. 2023- 2024 sessionah pawh rei tak chhung zirlaiten zirlaibu an nei thei loa, AAP chuan nasa takin an auchhuahpui tawh tih sawini, “Tun session tharah hian sawrkar tharin min hruai a, hmasawnna tam tak kan hmuh avanga lawmawm kan tih hle rualin, zirna kawngah hmasawnna kan la hmu ve thei rih lo hi pawi kan ti a, tun thlenga zirlaiten zirlaibu an la nei kim thei lo hi pawi kan ti hle,” a ti.
Zirlaite hmakhua ngaiin, a rang thei ang bera lehkhabu an chan kim theih nan sawrkarin hma la se an duh tih a sawi a ni.
A hun taka zirlaiten zirlaibu an dawng kim thei lo thin chu sawrkar inthlahdah vang leh zirna an ngaihsak tawk loh vangah an ngai tih AAP Mizoram president hian a sawi a. Hetiang harsatna hi class-IX chunglam ten an neih loh lai a, elementary leh primary section ten an nei fo thin chu sawrkarin zirna a ngaipawhmawh tawk lo tih lantirna ni ah an ngai tih a sawi.
Zirlaibu indaihlohna enfel turin AAP-in sawrkar phut
