Kawnpui MZP chuan an huamchhunga school naupang bag rih zawng an enfiah a. Sawrkarin inkaihhruaina a siam ang aia rit ak an awm nual tih an hmuchhuak.
MZP Sub-Hqrs Kawnpui hian Ningani khan zirlai naupang bag rih zawng an enfiah a. Sawrkar laipui Ministry of Education-in ‘Policy on School Bag 2020’ hmanga inkaihhruaina a siam chu zirna in thenkhatah zawm a hlawh tawk lo tih hmuhchhuah niin, zirlaite school bag ah hi a rit hlawm hle tih an sawi a ni.
Zirlaite rih zawng atanga teha zaa 10 aia rit school bag ah tir loh tur tih a nih laiin, Kawnpuia school thenkhat endikna atangin zirlaite school bag chu a rit fal hle tih hmuh chhuah a ni, an ti a. A bikin private school-ah bag hi kg.8 aia rit ak an awm tih an sawi.
‘School bag rih zawng tura inkaihhruaina angin, class 1-5 inkarah kg.2.500 a pel lo tur tih a ni a; class 6 & 7-ah kg.3 aia rit lo, class 8-ah kg.4 aia rit lo, class 9 & 10-ah kg.5 aia rit lo tur a ni tih a ni a. Zirlaiten school bag an ah rih lutuk avang hian kum khat pawh tling loa school bag chhia a tam hle a; zirlaite hriselna pawh nghawngin hnungzang na leh dar na nei an tam a ni,’ MZP thuchhuah hian a ti.
Zirlaiten school bag an ah rit lutuk loh nan hma la nghal turin zirna in hrang hrang an ngen tih sawiin, sawrkarin inkaihhruaina a siam ang zawm tura an ngen bakah sawrkar hnenah pawh thlen an tum tih an sawi a ni.
Zirlaite bag rih dan enfiah
