Daily Newspaper

Zirlaite hmalam hun atan lungruala thawhho a pawimawh

20

-Shri Ramesh Pokhriyal ‘Nishank’

(He thuziaktu hi Union Minister for Human Resource Development, Government of India a ni)

“Tunlai huna propaganda hi thudik hrul a mi hruaikawi tum emaw thil tum nawrna hmanrua atana chauh a hman a ni lova. Ngaihtuahna awmze nei zawk chawk buaia, thudik nuaibona hmanrua a ni”. He thu hi Garry Kasparov-a sawi hian tunlai chu ka rilru a luah hneh hle mai a, Sorkarin CBSE zirlaite hmakhua ngaia hmalakna a neih pawh propaganda huatthlala hmangin kan bei duh ang tih hi ka ring pha ngai lo. Zirna lam hi politics khawih buaiphak loha dah tuma hmalakna kan kalpui apiangin mi thenkhat, lar khel a hmanhlelte’n zirna hi hmanruaah hmangin sorkar hmalakna leh ruahmanna tibuai thei zawngin chet an la fo thin a; hei hian zirlaite a tihrilhhaiin an rilru a tina a, mak tiin an hawihai thin a ni. Tunah pawh hian heng mite hian zirlaite hmakhua ngai a, kawng hrang hrang a rilru leh thiamna lama hmasawnna an neihna tur an duhsak vang nilovin lang lo lama anmahni dinhmun siam tumna leh kaw hreuhna hmanrua mai a ni.

Hripui leng hian Ministry tan harsatna tam tak paltlang ngai a lo keng tel a, zirlaite hnena zirna tha pek dan tur bakah zirna in nghawng tha a neih theihna atana ruahmana awmsa vawnnun leh zirlai tana zirna boruak tha siamsak dan tur lam thlengin ngaihtuah tel a ngai a. Hetiang ti tur hian Ministry chuan zirlaite kaihhnawih thil tam tak ngaihtuahin rim takin a thawk a. HRD a team-te hi an hmalakna leh thuthlukna entawntlak tak an siam chungchangah hian ka chhuang hle a. Sikul chawlhlai pawha naupangte’n mid-day meal an dawn chhunzawm theihna turte, internal assessment hmanga naupangte pawlsawn tirte, pawl 12 zirlaite tana ‘power of choice’ an siamte leh India rama e-learning tichangtlung tura hma an lakna te hi a chhunzawm hle a ni.

Chutihrual chuan, tunhnai atang hian mamawh dan thlir chunga CBSE board syllabus ennawn chungchangah indemna rawngkai hriat tur hi a awm ta fo mai a. Dawt hmanga inpuhmawhna karah hian keini Ministry a mite chu kan Prime Minister Zahawmtak Pu Narendra Modi-a kaihruaina hnuaiah hian zirlaite tana zirna tha (quality education) pe tura ruahmanna awm kalpui tur hian kan ding nghet tlat a. Mahni tanghma hai vanga syllabus ennawn dan sawiseltute hian mipui mimir tana zirchhian theih tura a awm chung pawhin a inkaihhruaina hi hrethiam turin chhiar pawh an chhiar chiang lo a ni.

Engvanga tih nge anih leh a tihchhan:
Zirlai, nu leh pa leh zirtirtute atanga ngenna tam tak dawn a nih hnuah CBSE hi an curriculum ennawna pawl 9 atanga pawl 12 inkar zirlaite tana tihtur tam lutuk titlem tura rawn a ni a. Curriculum hi 30% en that ni tawh mah se sikul hotu leh zirtirtute chuan thupui paihte chu thupui dangte nena an inkaihhnawihna sawihfiah leh sawizau ngai a awm anih chuan zirlaite hnena hrilhfiah chu an mawhphurhna a ni dawn a. Hei hi hripui leng vanga inzirtir hun tam tak chan a nih tak avanga kum 2021 annual exam-a zirlaite phurrit lutuk tur tih tlemsakna atan liau liau a tih a ni a. Heng thupui (topic) te hi zirlaite tana internal assessment leh kum tawp board examination-ah tel an ni dawn lova, amaherawh chu CBSE chuan sikulte chu NCERT Alternate Academic Calendar zawm turin a hrilh a ni. He calendar hi mipui vantlang hmuh theih tura dah a ni a, heng thupui (topic) hleihluak taka sawi larte hi calendar-ah hian en theihin a awm vek a. Ka sawi tawh ang khan ‘ShikshaseepheleSurakhsa’ a ni a, he hmalakna hian zirlaite phurrit leh harsatna a tikiang dawn a, COVID 19 hripui leng vanga nakum exam atan bik chauh a tih a ni.

Engtiang a tih nge anih:
Lar khelte’n an sawi ang a inthununna hnuaia ti tura tih anga he enthatna hi kalpui a ni lo a. Kan SyllabusForStudents2020 campaign kaltlangin mithiam leh educationist thahnem takte thurawn leh rawtna hmanga uluk leh fimkhur taka kalpui a ni a. Mi thiam 1500 chuang hnen atangin rawtna kan dawng a ni. Learning outcome ngaihtuah chungin Educationist zahawm takte rawnna leh thiamna hmang tangkaiin he ennawnna hi kan kalpui thei a. Kan hmalakna sawiseltute’n an sawi anga nationalism, local government, federalism leh a dangte, thupui 3-4 chauh paih anga thudik lo an sawi ang hi nilovin subject zawng zawngah ennawnna hi kalpui a ni a. Entirna thenkhatah chuan, economics ah chuan Measures of Dispersion, Balance of Payments Deficit, leh a dangte chu tel ngei ngei tur an ni a, Physics chuan Heat Engine & Refrigerator, Heat Transfer, Convection & Radiation leh a dangte chu paih theihloh tel ngei tur an ni a. Chutiang bawk chuan Maths ah chuan Properties of Determinants, Consistency, Inconsistency, and Number of Solutions of System of Linear Equations by Examples leh Binomial Probability Distribution te; Biology ah chuan portions of Mineral Nutrition, Digestion & Absorption te chu evaluation a telh loh tura paih an ni.

Heng thupui(topic) te hi engemaw rilru dik lo pu leh ruahmanna engemaw vanga telh nia ngaihna hi rilru dik lo te chauhin an put a rinawm. Ministry of Human Resource Development hian zirna tha pek duhin hemi atan hian ngawrh takin a thawk a, zirlaite’n zirna tha an neihna tur leh anmahni chawikanna atan thuthlukna huaisen takte a siam thin a. Education hi hriatna inpekchhawnna ringawt ang a ngaihtur a ni lova; zirlaite rilru ngaihtuahna tizau a, harsatna sukiang thei turte, an ngaihtuahna tihchakte, thil ngaihtuah chhuah thiamna an neih theihna turte, insiamrem zirte leh harsatna hmachhawn a hneh thei tura thiamna pek ang zawk pawh a ngaihtuah tur a ni a. “Thiamna mitin tan – Mitin tan” tih hi kan pawm dan a ni a, curriculum hmanga thiamna duanchhuah ringawt hi kan innghahna lungphumin a tum a ni lo.

Kan zirlaite’n zirna kalphung mumal tak atanga thiamna diktak an neih theihna atan thiamna leh zirna kalphung hi kan ngaihlu a. Kan thil sawiho hi thuneihna duh vanga zirna kalphung sawisel leh hmalakna thianghlim lote’n pawlh buai lo se, zirlaite hmasawnna leh anmahni chawikanna lam hawi chauh ni hram rawh se. Tichuan, India ram hi hriatna leh thiamna hmunpui, hmasawn zel tura ruahmanna leh hmalakna kalpui thei a siam tura lo pen chhuah turin ka sawm che u a. Zirlaite’n zirna hna an neih theihna turin lungrualin i thawk ho ang u.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy