George L.Ralte
Vaivakawn
Kan ram hmasawn zelna atana thil pawimawh tak mai pakhat ZIRNA tha hi a ni. Zirna tha nei tur chuan a kal phung a that a ngai a, kan ramah chuan mi thiamte’n uluk takin hun eng nge maw ti chhunga hman tur an duang lawk thin. Chumi hmanga inelna chu kan nei tlang hi a ni ber mai. Zirlaibu siam leh chhut thu ah te ennawn leh kal phung siam chungchangah, sawrkar thuneitu mawhphurhna hi a sang em em a ni.
Kum 50 lo la awm leh tur a thangtharte khawvel duangtu an nih miau avangin an hna a pawimawhin, tihsual nei thiang lo tluka an thawh taihmak hi a pawimawh em em a ni. Mi zawng zawng thil a nih avang tak hian kan ramah chu sikul an kal hma chungchangah te, sikul chawlh hun te, exam hunte zir tur chin duansa hmangte leh ruahmanna kalpui a nih avang hian zirlai bakah zirtirtute, nu leh pa mai bakah mi dangte hi an pawimawhna pawh a sang viau reng a ni.
Kum tin hian ram hmasawn nan zirna pawimawhna hre chiangin WORLD ECONOMIC FORUM an tih te chuan, tehfung sawmhnih hmangin ram hrang hrangte zirna dinhmun a zirchianna a tichhuak thin a. Kum 2017 daih tawhah khan Asia ram lam hi an che tha hle mai a, pakhatna dinhmunte pawh hauh char char – Finland ram pawh a hnung tawlh dawrh phah a ni.
WORD ECONOMIC FORUM in Criteria an hmanah hian zirna mai bakah, ram hmasawnna atana pawimawh ram leilung nghawng tham hmasawnna heng – Macro-Economic Enviroment te, Infrastructure te hi a tel thin a ni.
Zirna atana senso leh zirna kaihhnawih bakah mihring hriselna leh dam rei zawng te, Primary zirna leh mi thiam hmantlak chherchhuah tam lamte thleng hian tehkhawng hman thin niin, ram changkang kan tih USA leh UK te chu zirna lam titha ram 10 thlanchhuah thinah tel phak loh changte neiin, zirna thatna ram WORLD ECONOMIC FORUM ten an tarlan thinah hian Japan ram leh South Korea ramte hi an sang thei hle thin a ni.
South Korea ram zirna System hi khawvelah pakhatna niin mi thiamte chuan an ngai thin a. South Korea ram sikul naupangte hian chawlhkar khatah ni sarih sikul kal nan an hmang thin niin an sawi thin a ni. Tunlaiah chuan ram tam zawkte hian Technology thiamna hi lehkha zir nan an intihhmuh tawh a, hriat belh theihna min petu a nih avangin he lamah hian tan an la nasa hle a, zirna sang zawkah phei chuan a tangkai hle a ni.