School Education Department leh Mizoram Education Reforms Committee chuan tha zawk tur nia ngaiin zirna kalphung thar an duang chhuak a.
Chungte chu: Class 10 leh 12 result bu-ah Top Ten leh Division tihlan a ni tawh lovang. Class 1-10 tan kum 2027 atangin academic thar January-December kalpui a ni ang a, Class 11&12 erawh April-March hman chhunzawm a ni ang. English Medium School-ah Home Language Day hman a ni ang. Hindi zirtirtute training tha tak pek an ni ang a, thla khatah Hindi Speaking Day hman a ni ang. Common Uniform hman chhunzawm a ni lo ang a, sikulte duh dan angin a kal ang. Zirtirtu TET (Teacher Eligibility Test) nei loten kum hnih chhungin TET certificate an nei vek ang. Hei hi Supreme Court-in mandatory a tih tawh vang a ni.
Supreme Court mandatory (TET) bak khi chu, zirna quality chawikanna tura hmalakna ropui tia han sawi zui tham a ni lutuk hlawm awm lo ve.
Pawl hniam lam academic session tihdanglam hi chu, keimahni Mizoram nunphung nena inhne rem tur a nih avangin a tha thawkhat ang a, phai lama zir zawm duhte tan pawl sang lam pawl 11&12 academic pangngai April-March tih pawh hi a tha. Home Language Day leh Hindi Speaking Day tihte pawh khi a pawimawh, thlakhatah vawikhat mai ni lovin, kar tin vawi khat neih zawk awm tak a ni.
Result bu-a tarlan loh tur tihte khi, result nei tha sikulte chuan an sikul hmingthatna a nih avangin an pho chhuak tho dawn a, result bu tihchhuah dan hian eng tin nge zirna quality a siam that sawt dan tur hi hriatthiam a har hle.
Zirna kalphung siksawite hi a pawnlawi viau hlawm mai a, a aia thuk zawka kan liluh a tul tawh hle. Zirna quality tha hi kan duh a, ‘world class education’ te kan han ti leh lawk a, a hming ropui tak vuah lamah hian kan hmanhlel vel mai mai niin a ngaih theih. Zirna quality tha nei tur chuan pawn lam langthei (tangible quality) aiin pawn lama lang lo, chhungril lam (intangible quality) hi kan ngai pawimawh ber tur a ni.
Zirna kalphung siksawi dawna ngaih pawimawh hmasak ber tur chu— ‘teaching method’ leh ‘learning method’ hi a ni awm e. He lama kan luh thuk loh chuan, pawn lam langthei lam chu engtin pawh siksawi kual vel mah ila, engtikah mah quality education hi kan hlawhchhuah a rinawm loh a ni. Zirlaite hi note siamsak hmanga chaw nem kan barh reng chhung chuan, chaw rum hi an ei thei lawk dawn lo. Self note ti thei tura interactive lectures uar te pawh a pawimawh, he lam hi chu kan educationist-te hi a hre hlei hlei an ni e.
Zirna kalphung siksawi thlirletna….
