Zirtirtu 150 chuang
an awmna turah awm lo
– Dr R Lalthangliana
Mamit district atanga hlawh la, khawpui lama thawk daih si zirtirtu 150 chuang an awm tih Dampa bialtu MLA Dr R Lalthangliana chuan a sawi.
MLA hian a bial chhunga school leh health sub-centre hrang hrang a tlawh a, Dampa bial chhung sikul atanga hlawh la reng si, anmahni Aizawl lama thawk daih pawh an awm tih sawiin, “Mamit district chhung atang hian zirtirtu 150 chuang Mamit district school atanga hlawh la, khawpui lama anmahni thawk daih si an awm thu min hrilh,” a ti. Hei hi thil tha lo tak, siamthat thuai ngai a tih a sawi.
Dampa bialah sawrkar school building nei mumal lo, an luah lai pawh chhe tak tak, thawmthat ngai a tam hle tih a hmuna a hmuh thu a sawi. Silsuri-ah pawh zirlai naupang 160 awmnaah zirtirtu nghetlo pahnih chauh an thawk a, school building luah tur an nei mumal lo, tiin, “Hengte hi hma lak thuai a nih theihnan bialtu MLA ka nih angin sawrkarah ka thlen ang,” a ti.
MNF sawrkar laiin, health Sub centre 289 chu Health & Wellness-ah an hlangkai a, sub centre awm lohnaah health clinic 235 an din bawk a, nau nei leh hliam tenau chenin an chhawr tangkai hle tih Health minister hlui Dr R Lalthangliana hian a sawi.
“Tunah chuan sawrkar tharin a titawp ta vek a. Health sub-centre leh PHC-ah pawh health worker awm lohna a awm a, thawktu hrang hrang indaihlohna a nasa hle. Health service hi chu mipui thih leh dam inkara thawktute an nih avangin, sawrkarin thil dang zawng aia a ngaihpawimawh a tul,” a ti.
Khaw hrang hrang mamawh inanglo tak tak chu bialtu MLA a nihna anga state sawrkara nawr chi leh central lama nawr chi a awm tih sawiin, Delhi-a a kal hmasak ber huna thlen chi, thenkhat chu la nghah deuh ngai chi a awm niin a sawi a ni.
Zirtirtu 150 chuang an awmna turah awm lo – Dr R Lalthangliana
