Zirtirtu leh headmaster kan indaih lo hle
– Education minister
School Education department hnuaiah zirtirtu leh headmaster an indaih lo hle tih sawi a ni.
School Education minister Dr Vanlalthlana chuan Assembly Session-ah zirtirtu leh haeadmaster indaih lohna hi a sawi a. Zirtirtu hi a nghet, muster roll, contract leh casual teacher-te nen vek sanction post atanga chhutin, middle school-ah zaah 42-in an indaih loa, high school-ah zaa 35.41 tih a sawi.
Primary school-ah erawh tunhnaiah 234 an la thar a, an indaihlohna tam tak a phuhru a, sanction post atanga teh chuan 200-a an pelh laiin, a data atanga en erawh chuan, school an neih zat atanga tehin, school tinah zirtirtu 4 tling lo hret awm ang chauh an ni tih a sawi. Middle school-ah chuan school pakhatah zirtirtu 3 anga ngaih theih (2.98) zel awm anga chhut a ni tih a sawi.
Samagra school (lower primary school) ho chu zirtirtu pahnih hmanga hawn/ bul tan a ni a. Sawrkar laipuiin zirtirtu dang lakna tur a sanction belh tawh si loa, indaihlohna a ti nasa zual tih School Education minister hian a sawi a ni.
Headmaster pawh primary school-ah zaa 58 post a awl a, school pahniha pakhat zawk chu headmaster nei lo ang zel an ni tih a sawi. Middle school-ah pawh zaa 52.77 a ni, tiin, “Khawtlang kan tang thin a, MLA pawh kan tang viau naa kan indaih lo takzet a ni,” a ti.
Zirtirtu leh headmaster kan indaih lo hle – Education minister
