Govt Champhai College-a Political Science leh Economics zirtirtu awm tur zat dah ngiatna kal zelah August 5 atang khan Champhai MZP chuan sawrkar pisa leh zirna in zawng zawng kal tur an dang a. Hetihlai hian Higher & Technical Education minister chuan Mizoram pumah college zirtirtu hi rualkhai taka sem tum a nih avangin chumi peih hma chu college pek bik neih a rem lo tih a sawi.
MZP Hqrs. Champhai hian August 2 khan an thil phut tih hlawhtlinna atan Govt Champhai College thawktute leh zirlaite college kai tur an lo dang tawh a. An ngenna tihhlawhtlin a nih loh avangin August 5 – Thawhtanni atang khan Champhai district-a sawrkar pisa kai tur leh zirna ina kal tur dangin an chhunzawm a, kal lui an awm lo nia thu dawn a ni.
H&TE minister Dr Vanlalthlana chuan MZP Hqrs Champhai atangin kumin May 3 leh July 18 khan lehkha an dawng a. Zirtirtu semrual hi sawrkar hmalak mekna a nih avang leh hmun dang zirlai pawl atangte pawha zirtirtu indaih lohna phuhruk tura ngenna lehkha an dawn tho avangin, an vai hian semrual hna kalpui hun lo nghak hram tura ngen an ni a. Chuti chunga zirna leh sawrkar hna tikhaihlak zawnga hma lak a ni chu pawi a ti hle tih a sawi.
“Rationalisation kalpui tura hma lak mek a ni a, college tam takin zirtirtu an mamawh em em tho laia college pakhat tan bika transfer tih bik hian thil tha lo dang a hrin chhuah kan hlau a; college pakhat tan chauha zirtirtu sawn hi a remchang loa kan hriat avangin MZP Hqrs Champhai pawh an hmalak tum anga ti lo turin minister leh bialtu MLA kaltlangin lo nghak hram turin ka ngen nawn a ni,” a ti.
College zirtirtu rationalisation hi factor 7 vel en tur a awm a, pawhkhawm a, semrual a ngai. Duh angin a chak thei loa, August 22 hian tihfel hman an tum tih a sawi bawk.
Champhai district chu international border bula awm a nih angin, sawrkar hmasa leh tun sawrkar pawhin college tihchangtlunna lamah a duhsak a; RUSA1, RUSA 2 leh PM-USHA atanga thuamthat mek a nih bakah zirtirtu dah belh chungchangah pawh a hrana post siam belhna tur thutlukna siam a ni tawh a. Chutihlaiin Mizoram pum college dinhmun en tel chunga kal a ngai a, zirtirtu awm tlem lam anga chhut chuan Political Science leh Economics department bikah chuan college dang, dinhmun tha lo zawk pawh an awm a; chumi anga semrual chu nghak hram a, an thil tih chu tawpsan turin Champhai MZP chu a ngen tih minister hian a sawi a ni.
Zirtirtu phutin pisa/sikul kai tur dang Semrual hma chuan pek bik nei thei lo – H&TE minister
