School Education minister Dr Vanlalthlana chuan an department hnuaiah zirtirtu post 2991 a ruak tih a sawi. SEDP zirtirtu an hun tawp tawh te aiawh tur muster roll-a lak tum a ni tih a sawi bawk.
Assembly Session-a zawhna a chhannaah minister chuan, zirtirtu post ruak hnawhkhah tum niin, Recruitment Rules leh sawrkarin dan a neih sa anga lak tum a ni a, merit base-a lak an ni dawn tih a sawi. Zirlai leh zirtirtu awm zat inrualkhai lohna zualpui chu ngaihpawimawh hmasak phawt tum a ni tih a sawi bawk.
SEDP zirtirtute aiawh tur hi muster roll-a lak turin an ti a, Group B post a ni a, contract anga tih dawnin sum mamawh a tam a, DP&AR kutah awmin ruahmanna siam mek a ni tih a sawi a. A khaw mite duhsak chungchangah, central scheme emaw state-in a hranpaa scheme a siam emaw a nih loh chuan, sawrkarin kalphung a neih pangngai anga lak a ngai a, a khaw mite duhsak ngawt theih a ni chiah lo tih a sawi. Samagra-ah a khaw mite duhsak hram hram a nih laiin, tuna lak turah chuan hma lak tum dan sawi lawk theih a ni lo tih a sawi.
Samagra hnuaia school upgradation kalpuinaa zirtirtu 161 lak chu fair takin an ti a, result an tichhuak hnai a, appointment order pekchhuah theih tep a ni a. School upgrade thar hoah hian admission lak turin lo bawhzui theih a ni tih Dr Vanlalthlana hian a sawi.
School upgrade thar, lumpsum, pro adhoc leh provincialise hote a taka function hun tur hriat theih a la ni loa, DP&AR leh Finance-in an phalsak hun hun a ni a, budget-ah erawh an dah tawh tih minister hian a sawi a. Samagra hnuaia zirtirtute chu sawrkar hmasa hnuaiah ruahmanna a awm tawh a, DP&AR ah inchiah mek a, dah ngheh tum emaw chu cabinet-a sawi ho a nih hnu ah DP&AR phal dan chin hriat hmasak a ngai tih a sawi a ni.
School upgrade tura tih tawh te dan dik taka upgrade an nih laiin a then chu ennawn ngai an ni a, eng ang chinin nge an inhriatthiam dawn tih DP&AR nen inrawn mek zel a ni tih a sawi a ni.
Zirtirtu post ruak 2991 awm SEDP zirtirtu aiawh la dawn
