Zirtirtute zinga certificate nei felfai lo chhuizui an ni dawn

Sawrkar hnuaia thawk school zirtirtu zingah marksheet leh certificate nei felfai lo an awm leh awm loh chhuizui a ni dawn.
School Education department hotute chuan Ningani khan an minister Dr Vanlalthlana hoin an hnathawh an thlirlet a. Zirtirtu zingah marksheet leh certificate nei felfai lo an awm tih report a ni a, heng hi chhuizuia a tul anga action lak tura sawi a ni.
Zirlaibu thar buatsaih a ni a, tuna hman lai nen a danglam dawn tih sawi a ni. Naupangte chu by heart ringawt loa, chik zawka zirtir dan tur, milem, drama leh field trip tih tam, naupangte an tawnhriat hmang leh zawhna zawt thiam tura chher tum a nih dan sawi a ni. Class V & VIII ten tun promotion exam atang hian zawhna inang an chhang dawn a; school 770 ah he zawhna thar hmang hian an exam dawn a, result hi SCERT-ah lakkhawm a ni dawn tih sawi a ni.
PM Poshan tha taka kalpui a nih thu leh state share hmuh that a nih avangin chawchhumtute hlawh pawh pek theih a nih thu sawi a ni bawk.
School Education minister chuan school-a thawkten Vidya Samiksha Kendra (VSK) a attendance pek that a ngai tih a sawi a. Hnathawh chu online-ah hmuh theihin awm se, a duh apiangin an lo hmu anga, hnathawh tha lo a veng dawn tih a sawi a ni. VSK hmang hian an hnathawh theih chin nawr san theih a nih thu, Google map update lote chu an grant dawn tur hmundanga pek leh mai thlenga hma lak a tul thu a sawi.
LDC indaih lohna chu sawrkarin lak phalna a pek tawh chin bakah dil belh tum a ni, tiin, Exam Centre school-te mamawh pawh phuhruk theih beisei a ni tih a sawi bawk.