Daily Newspaper

ZMC-a khum awm zat aia tam hri kai enkawl

28

Mizoram sawrkarin Covid-19 kaihhnawiha inenkawlna hmunpui bera a hman Zoram Medical College – State Referral Hospital Falkawn-ah Covid kai leh mahni inenkawl thei loten an luhpui anmahni enkawltute chu, khum ruahman sa aia tam daih an ni reng rih.

Ningani khan sample endik runpui kalpui mek leh Covid dona kawnga thil pawimawhte ngaihtuahin Health & Family Welfare minister Dr R. Lalthangliana kaihhruaiin sawrkar hotute an thukhawm a. Heta ZMC hotute report danin, July 15-22 inkar hian ZMC ICU khum 34 awmnaah chawhrualin nitin mi 44 (attendant telin) an awm a, Covid ward khum 273 awmah hemi hun chhung vek hian nitin damlo 305 (attendant telin) enkawl an ni a, chhuatahte an mut a ngai thin a ni.

PM Cares hnuaiah Central PWD-in ZMC-a oxygen plant 1000 lpm a bun tur pawh kumin August 15 hmain peihfel a nih beisei a ni a. ZMC-a HLL Lifecare Limited-in ventilator 10 an pek tur pawh a buntu tur company engineer chu karleh lamah a rawn kal dawn tih sawi a ni bawk.

Health minister chuan inkharkhip bur puan chhunga Aizawl khawpui leh Mizoram hmun hrang hrangah Covid-19 hrileng inkaichhawnna chhuchat tura theihtawp chhuahna pakhat atan sample endik runpui hi kalpui a ni tih a sawi a. Sample test kit an chahte a hun taka a rawn thlen theih loh mai an hlauhthawn laiin, GAD Civil Aviation Wing-a principal consultant Wg.Cdr J. Lalhmingliana’n theihtawp a chhuahpuina avangin Kolkata Airport-a test kit parcel 82 tang reng chu July 22 khan parcel 75 rawn thlengin, July 27 ah parcel 7 a rawn thleng leh dawn a, tluang takin hma an la chhunzawm zel thei dawn tih a sawi a ni.

Civil Aviation principal consultant chuan tuna Delhi Airport-a test kit parcel 100 la tang chu July 23 hian Delhi-Aizawl direct flight Indigo Airlines hmangin phurh thlen a nih tur thu a sawi. A sawi danin, kumin May thlatir atanga July 21 thlengin thlawhtheihna vawi 58 (May-ah 23, June 17, July 21 thleng 18) a service tawh a; khualzin 7190 (May ah 2769, June 2488, July 21 thleng 1993) an rawn luh tawh a. Khualzin rawn thlawk lut/haw zingah Lengpui Airport screening point-ah Covid-19 hri kai mi 118 (May 97, June 8, July 21 thleng 13) an hmuchhuak tawh. Passenger rawn lut zinga 1.64% positive an ni a, thlawhtheihna pakhat zelah Covid kai 2.03% hmuchhuah ang a ni, tiin, “Tun dinhmunah chuan rawn lut lam aiin Mizoram atanga zin chhuakte hi an hlauhawm tawh zawk ang hiala ngaih theih a ni,” a ti. Covid-19 dona atana hmanraw mamawhte chatlak loa phurh thlen zung zung a nih theih nan kar khata thlawhtheihna service zat tihpun a tul hle nia a hriat thu a sawi.

Thutkhawmah hian mi 200 awm theihna ICFAI University CCC chu hman theih tura peih fel a nih thu sawi niin, mi 300 dah theihna tur Falkland-a RAY building pawh Aizawl mayor Lalrinenga Sailo hoin Aizawl bawrhsap, P&E, PWD, PHED leh Health department-ten a hmunah an enfiah tawh a, rang taka cheithata luah thuai tura ruahman a nih thu sawi a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy