Daily Newspaper

ZMC-ah in-ek-beng mek, dinhmun a tha lo

13

Aizawl, August 3 : Mizoram sawrkarin Covid kaite enkawlna bik liau liau atana a hman Zoram Medical College – State Referral Hospital Falkawn ah Covid kai damlo leh anmahni awmpuitute an inek beng mek a, khum awm zat aia tam daih mi an awm avangin inenkawlna leh a kaihhnawih pawhin a tuar nia sawi a ni.

Health minister Dr R Lalthangliana’n thuthar thehdarhtute hnena a sawi danin, ZMC dinhmun a tha loa, khum 307 awmnaah hian hri kai enkawl ngai 400 chuangin luahin an inek beng a, hei hian damlo enkawlna quality a nghawng tih a sawi. Hetiang hi kan dinhmun a nih avangin hri kai hmuhchhuah tamna ber Aizawl bikah chuan sample endik runpui neihna atan leh hri darh zel tur venna atan inkharkhip leh lawk hi a tul bik tih a sawi.

ZMC-a enkawl zingah a na nep deuh, enkawlna hmun atanga la chhuahtir (discharged) theih si loh te dahna atan Mualpuiah khum 100 dah theihna tur Covid damdawi in ruahman a ni tih a sawi a. Hetihlai hian tunah rih chuan khum lei tur a awm loa, Pachunga University College tan an dilna chu an lo phalsak a, a hawhin an hawh thei hlauh tih sawiin, khuma hman tur mattress pawh, tunah rih chuan, Assam nena inkalpawhna kawng danpin a ni bawk nen, lei tur awm mang lo tih a sawi a ni.

India ram pum anga chhut chuan Mizoram chu Covid kai hmuhchhuah leh he hri kaihhnawiha nunna chan tlemna pawl ni mah se, Aizawl huamchhungah he hri inkaidarhna leh he hri kaihhnawiha nunna chan an tam filawr hle tih Dr R Lalthangliana hian a sawi a. “Inkharkhip hian kan economy a nghawng dan leh khawsak harsate harsatna hre reng mah ila, kan dinhmun enin kan positivity rate san laia lo inthlah zalen kha tih ngamah kan ngai lo. Nasa taka kan inkhuahkhirh a tul bik a, kan thurelah hian Mizoram Kohhran Hruaitute Committee, NGO Coordination Committee aiawh, Aizawl City Local Council Association aiawh, mayor, medical lam mi te leh, a tul dan azirin a kaihhnawih minster te nena thukhawm a, mawhphurhna la tlanga sawi ho thin a ni. Inthlahdul hi rem lo tihna kan nei lian a ni,” a ti.

Integrated Disease Surveillance Programme (IDSP) state nodal officer Dr Pachuau Lalmalsawma sawi danin, kumin July-ah Mizorama hri kai hmuhchhuah 18,433 a awm a, heng zinga 12,329 hi Aizawl district ami niin, chuta zinga 10,650 chu Aizawl Municipal huamchhunga hmuhchhuah niin, Aizawl district-a hri kai hmuhchhuah atanga AMC huamchhunga hmuhchhuah bik hi za zelah 86.38 a ni.

ZMC director Dr John Zohmingthanga sawi danin, August 2 chhun thlenga Mizorama Covid vanga thi 151 zinga 134 chu ZMC-ah dahluh hnua thi niin, enkawlna damdawi leh hmanrua an neih ang ang dawng hman an ni. ICU-ah khum 34 an nei a, kumin July hnulamah chuan luahkhah reng a ni. ICU-a khum bakah ward pangngaia khum 270 awm nen, a vaiin ZMC-ah khum 307 vel a awm. Kumin July 20 ah damlo, a awmpuite leh naute luhpuite nen mi 343 an awm a, hetang hian san lam pan chho zelin 370 – 400 inkar an awm chho ta reng a, July 30 khan 424 an awm.

“A awm thei zat aia tam daih kan awm takah hian a senso a san belh a, kan bawlhhlawh senghawi leh sawngbawl ngai a tam belh a, a nih tur ang aia tam kan awm avangin hri inkai darhna risk a sang zual bawk,” a ti.

ZMC-ah hian kumin July khan nau nei 39 an awm a, an zinga 8 hi chhar pangngaia chhar niin, a dang zawng chu zai chhuah a ni. Covid kai ICU-a dahluh hoah kumin March 20 atanga July thleng khan, Covid vaccine full dose la tawh zinga 8-in nunna an chan a, dose khatna la hman 12 chu ICU-a luhpui ngai an ni a, full dose la tawh mi 5 vel chu ICU-a dahluh ngai ni mah se, hma sawn lam panin ward pangngaia sawnchhuah leh an awm a ni. “Zirchianna chiang tak la awm lo mah se, vaccine la te chuan he hri hi an tuar chak deuh bika ngaih a ni,” Dr John Zohmingthanga hian a ti.

ZMC-a lut Covid hri tuar chak lo zingah kum upat vang, zunthlum leh hyper tension neih kawp vang, lung lam thatlohna nei sa, nau pai lai hrim hrim, chuap natna nei sa, cancer, kal natna nei sa te niin, ICU-a dahluh ngai tam ber pawh hetiang zinga engemaw ber nei hi nia sawi a ni.

ZMC-ah hian sawrkarin tunhnaiah thawktu 124 a dahbelh a, volunteer 160 chuang awmte nen, an vaiin thawktu 300 vel an awm a. Heng zinga 270 ve hian riahchilhin a dang hi lângin an kal a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy