ZMC-ah master degree zirna hawng
Sawrkarin a ngaihthah dawn lo – CM
Zoram Medical College-ah public health bikah master degree zir theihna hawn thar a ni a. ZMC chu state sawrkarin a ngaihthah ngai dawn lo tih chief minister Lalduhoma chuan a sawi.
ZMC-a Girls’ Hostel thar leh Post Graduate Degree in Public Health zirna thar hi Nilaini khan chief minister hian a hawng a. Post graduate course thar hawn a ni chu ZMC-in hmalam a pan zel tih a lanna a ni, tiin, “Sawrkar chuan a ngaihthah ngai dawn lo che u a, zirna in tha zawk leh lian zawk a nih theihnan a theihna apiangah hma a la zel ang,” a ti.
ZMC-a thawkte chu sawrkar leh society anga thuang hniha an kal chu, an zavaia sawrkar ta an nih theih dan tur an ruahman mek a, Council of Ministers neih leh hunah chhawp chhuah an tum tih chief minister hian a sawi.
Tunah hian PM-ABHIM scheme atangin khum 50 awmna Critical Care Block sak tum mek a ni, tiin, mamawh dang pawh a theih anga ngaihtuah zel an tum tih a sawi a ni.
Mizoramin medical college a neih hnu ah state mamawh medical professionals tha chher chhuah an ni tan tih Lalduhoma hian a sawi a. “Khawvel thang zel leh mipui pung zelah hriselna lama mithiam kan mamawh tam tial tial a. Chu’ng kan ramin a mamawhte kan chherchhuahna hmun pawimawh chu a ni. Kumtin doctor thar za vel in rawn chhuah zel chuan kan indaih chho ve tial tial dawn tih a chiang a ni,” a ti bawk.
8 ZMC-a master degree zirna hmasa ber tur, Master of Public Health hi vantlang hriselna lama mithiam bik chher chhuahna tur niin, National Health Policy 2017-in a ngaihpawimawh em em a ni.
8 Mizoram University hnuaia kalpui tur niin, kumtin zirlai 6 zel zir theihna tur leh kum hnih chhung zir a ni a. A zir man hi kum khatah cheng nuai hnih vel a ni. A batch hmasa ber tur zirlai 6 admit fel an ni tawh.
8 Girls’ Hostel building thar, ‘Curie’s Ladies Hostel’ tia a hming vuah hi Ministry of DoNER, NESIDS OTRI sum vaibelchhe 10 hmanga sak a ni a; tirah khum 80 awm theihna tura duan ni mah se, khum 84 dah theih tura sak zawh a ni. Zopa chhiara chhawng 6 a ni.
8 Kum hnih leh thla 9 chhunga sak zawh a ni a, Mizoram PWD sak a ni. Hostel thar leh hostel awm tawhsa, khum 202 nen ZMC-ah hian a vaiin Girls’ Hostel khum 282 a awm tawh dawn a. Hmeichhe zirlai zawng zawng khum mamawh pek theih deuh vek beisei a ni.
8 Girls Hostel sak rual chiah hian Boys’ Hostel sakna tur pawh hmuh a ni a. Boys’ Hostel sakna tur hmunhma hi tlema siksawi hlek a nih avangin peihfel a la ni lo thung.
8 ZMC-ah hian 2018 August khan MBBS batch hmasa ber ten zirna an tan a. Kumin kumtir khan mi 97-in tha takin an zo. 2019 batch zirlai 97-in tunah intern an ti ve leh mek a. An ni bakah hian 2020 atanga 2024 inkar batch hrang hrang zirlai 480 an awm a, batch thar admission pawh tih mek niin, seat 100 awmah zirlai 85 admit fel tawh an ni.