Daily Newspaper

ZMC-ah sample test ‘hnatlangpui’ nei

33

Zoram Medical College laboratory-a Covid sample lak sa endik tur a tam tham tawh avangin Inrinni khan sample lak leh endik lama thawktute chu chawl bik awmloin an ‘hnatlang’ a, tum khata sample endik tam ber tum niin 1504 an endik hman a, hri kai hmuhchhuah erawh pakhat chauh a ni.

The Aizawl Post thudawn danin tunhnaiah Aizawl leh a chhehvelah Covid-19 kai an pun deuh avangin ZMC-a RT-PCR hmanga he hri kai leh kai lo endik hna thawktu, sample latute leh laboratory lama endiktute hi an thawkrim lehzual hle a; contact tracing atanga sample lak ngai ni khatah sample sang khat velte la in a karah hmanhmawh thlak thila lak thar ngai an awm reng bawk. Sample lak hmasak dan indawta kal hleihtheih lohin ngaihpawimawh hmasak ngai a tam bawk nen, sample lak avanga chhungkua khunghran rihte chu sample an lak atanga ni 5 hnua an result hre chauh te an awm.
Sample lak sa hi a inhnawhkhawm tam a, an vawnthatna hmun a khat deuhthaw reng mai niin thu dawn a ni.

Hei vang hian September 19 khan thawktute hian ‘hnatlangpui’ an nei a, an awl ni, ni ve turte pawh hemi ni ah hian kal vekin endik runpui an nei ta a ni.

September 10 zanlai atanga Aizawl Municipal huamchhunga partial lockdown neih hnu September 19 thleng khan sample 14865 lak a ni tawh a, hemi atang hian Inrinni thleng khan 9869 endik a ni a, hemi atanga hri kai hmuh hi 150 an ni tih thu dawn a ni.

Laboratory-a sample endiktute hian hri laka inven nan PPE suit an hak avang leh duh hun huna phelha teihawi a remchan loh avangin darkar engemawzat inzawm zatin laboratory chhungah hun an hman a ngai a, PPE suit nen chuan zunram thiar pawh duh hun huna tih ngawt rem loh chang a awm fo vangin diaper ha/bela hna thawkte pawh an awm thin nia thu dawn a ni.

“Sawrkar hnuaia thawk nghet tawhte hi chu sawrkar dan ang thlapin chawlh ni (off day) te an nei thei zawk a, Covid-19 leng vanga mahni thua a tul thawk tura inpe (volunteer) te phei chu nitina chechhuak te pawh an awm nia sawi a ni. Thawktute hi an zavaiin an thawkrim takzet a, kar khat chhung mahni ina haw loa awmchilh tawpte pawh an awm a ni,” thudawnna chuan a ti bawk.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy