Zoram Medical College & Hospital Falkawn chuan hma a sawn zel a, tih hmasawn zel pawh an tum tih chief minister Lalduhoma chuan a sawi.
ZMC&H-a Cardiothoracic & Vascular Surgery (CTVS) Unit chu Nilaini khan chief minister hian a hawng a. He unit hi sawrkar, Doctors for You leh SBI Mutual Funds Management tangtlangin SBI Mutual Funds Management Limited CSR cheng vaibelchhe 3.7 senga din a ni.
CTVS Unit hi 2024 November 27-a ama high-level meeting leh November 28-a ZMC&H a tlawh hnua a hmalak zuina atanga rawn chhuak a ni tih chief minister chuan a sawi a. Health minister Pi Lalrinpuii’n Mizoramah ngei super-speciality inenkawlna a awm theihna atan hma a la nasa hle bawk tih a sawi.
Suma tanpui turin SBI Mutual Funds Management leh Doctors For You nen an indawr a, anni’n phur takin an lo thawhpui a, hawn theih a lo ni ta, tiin, tanpuitu leh fund petute chungah an lawm hle tih a sawi a ni.
ZMC&H-ah hian kumin March atang khan thisen zam zaina a kalpui tan a, August 19 khan Mizoram sawrkar damdawi ina a vawikhatna atan lung zai hawn (major open-heart surgery) hlawhtling taka neih a ni. Lung zai hi Dr Mary Hmingthantluangi kaihhruaia Dr Intekhab Alam (Apollo Excel Hospital Guwahati) leh ZMC&H OT Team-in an nei tih a sawi bawk.
ZMC&H tihhmasawn zel an tum tih a sawi a. SASCI atangin Dialysis Unit an dah belh dawn a. Tuna pali chauh an neih chu cheng vaibelchhe 5.6 senga a dang 21 dah belh an tum tih sawiin, a complex chhunga inkalpawhna kawng siamthat ngai pawh thawh tumin hma an la mek tih a sawi.
“Mizoram-in CSR Fund kan hmu tlem bik a. Sum tam tak seng lo pawhin ram tana tangkai thil tam tak a thawh theih avangin CSR tam zawk hmuh theihnan Doctors for You leh SBI Mutual Fund pawhin min thawhpui zui zel kan beisei a. Mizoramah hma rawn lak chhunzawm ula kan duh a ni,” chief minister hian a ti.
ZMC&H tih hmasawn zel kan tum – Chief minister
