Nilaini khan Manipur-a Indigenous Tribals Leaders
Forum (ITLF) hruaitute’n union home minister Amit Shah an hmu a, thu mum nei lovin an tin.
Churachandpur district-a Zo hnahthlakte insuihkhawmna ITLF hruaitute hi an buaina chungchanga sorkar laipui hruaitute kawm turin New Delhi-ah an kal a, Thawhlehni khan Amit Shah hi hmu tura tih ni mah se parliament lamah an buai avangin a tuk atana sawn a ni.
Nilaini chawhma lam dar 11 khan Amit Shah hi an hmu ta a, an thuken berah chuan thu mum an nei thei lo tih thu dawn a ni.
ITLF hian Lamka khawpuia sericulture department office ramah tun buainaa nunna chan Zo hnahthlakte ruang phum an tum a, hemi an tum ni hian sorkar laipui aiawhin Assam Rifles hotute’n ITLF hruaitute dawrin an ngen a, thuneitute ngaichang tura an ngenna chu zahin ITLF lam pawhin an thil tum an thulh a ni. Chumi hnuah union home minister nena inbe tura tih an ni.
Amit Shah hian tlang takin ruang phum an tumna hi sawn turin a lo ngen a, sorkar ramah an phum a nih chuan buaina a punlun ang tih a hlauhawm thu sawiin, hmun danga phum tur hian a lo ngen tih thu dawn a ni.
ITLF hruaitute hian anmahni thu-a thu titlu thei an nih loh thua chhangin, mipuite nena inrawn tlan phawt a ngaih thuin an chhang tih thu dawn a ni.
ITLF hruaitute hnen atanga thu dawn danin, hemi chungchanga thu mum an neih theih loh hnuah ITLF hruaitute’n helicopter thlawhtir (service) tura an ngenna chu Amit Shah hian tihhlawhtlin a lo tiam nghal. ITLF hruaitute hian Lamka leh Aizawl inkar, Lamka leh Kangpokpi inkar, Lamka leh Moreh inkarahte helicopter service se tiin an ngen a, Amit Shah hian thla khat chhunga tihhlawhtlin a lo tiam a ni.
Zo hnahthlak hruaitute’n Amit Shah hmu
