Zo hnahthlak raltlan 20,000 chuang la awm

Manipur-a Zo hnahthlakte leh Meitei inkar a la fel thei lo a, raltlan pawh an la awm; Zo hnahthlak mi 20,000 chuang an la raltlan tih thu dawn a ni.
Manipur-a Zo hnahthlakte hi hmun hrang hrangah an tlanchhia a, Mizorama tlanchhiate chauh ni lovin, Manipur state chhung hmun danga tlanchhia pawh an thahnem. Lamka khawpuiah ringawt pawh Manipur hmun dang atangin mi engemaw zat an tlanchhia a ni.
Churachandpur district bikah chuan raltlan, relief camp-a awm mek hi mi 12,929 an awm mek tiin sorkarin a chhiah.
Relief camp-a awm mekte bakah hian hmun danga awm, mahse sorkar chhinchhiah, tanpuina la dawng mi 7563 vel an awm mek tih thu dawn a ni a, Kangpokpi district-ah mi 6000 vel raltlan an la awm nia ngaih a ni bawk.
May ni 3, 2023-ah Manipur-a Zo hnahthlakte leh Meitei inkarah buaina a chhuak a, a lehlam lehlam hi an sahimna zawngin hmun hrang hrangah an tlanchhia a ni. A tam zawk chu an kir leh tawhah ngaih a ni.
Manipur sorkar-in raltlante (internally displaced person) hi March ni 31 hmaa mahni ina awmtir an tum a, an sorkar hotute sawi danin, tuna raltlan la awmte hi chhungkaw 10000 chuang, mi 40000 chuang a ni.
Manipur hi President’s Rule-ah an awm mek a, India sorkarin sorkar thar din a tum mek. Sorkar thar din tumna chungchangah tun hnaiah Zo hnahthlak MLA-te leh India ram home minister an inbia a, an inbiak ni hian Churachandpur-ah chuan zirlaite’n lungawi lohna an lo lantir; buaina chinfel a nih hmaa sorkar din an duh loh thu an lo aupui a ni.
Churachandpur atanga thu dawn danin, India sorkar hian sorkar tharah chief minister chu Meitei ni se, deputy chief minister pahnih awm se, Zo leh Naga te’n pakhat ve vein chang se tiin a rawt a, mipuiin an pawm leh pawm loh erawh hriat a ni rih lo.
Zo hnahthlakte leh Meitei hi an inbei bur bur tawh lo a, mahse an la intlawhpawh lo. Mahni awmna chin ve veah an awm a, state khata awm e ti lovin inkalpawh lovin an awm. Hmun thenkhatah chuan khaw daiah duty an la awm a, ralmuang tawh deuh mah se inralring ru rengin an la awm tih thu dawn a ni.