Bangladesh-a Chittagong Hill Tracts-a Zo hnahthlakte tana rorelna sang zawk ngiattu Kuki-Chin National Front (KNF) te chu tun hnaiah sorkar aiawhte nen an inbia a, inbiak chhunzawm zel an tum tih thu dawn a ni.
KNF te hi Bangladesh sorkar aiawhte nen Chawlhni khan an inbia a, Bandarban khuaah chawhma dar 11.30 khan an inbia a ni.
Bangladesh sorkar hian Peace Establishment Committee a din a, anni hi KNF betu chu an ni. An chairman Kyew Shwe Hla-a’n a ho a, KNF lam hi an central committee-a tel mi pahnih leh senior adviser pathum an tel.
A hmain video conference hmangin an lo be tawh thin a, tun hi hmaichhana an inbiak hmasak ber tum a ni.
KNF hian Bangladesh prime minister hmuh turin Peace Establishment Committee hnenah hian an duh dante ziakin an thlen a, remna a awm theih nana an thil duh thil paruk an thlen a ni.
KNF hi ralthuam leka che an ni a, Chittagong Hill Tracts-a Zo hnahthlakte tan inrelbawlna hran an ngiat avanga rammu niin, Bangladesh sorkar nen an indo a ni. He an indona avang hian Mizoramah pawh Chittagong Hill Tracts-a Zo hnahthlak engemaw zat chu Mizoramah an raltlan mek.
Zo hnahthlakte leh sorkar inbia
