Zo hnahthlakte’n Pathian humhimna chang

Manipur-a Zo hnahthlakte leh Meitei inbeihnaah
Zo hnahthlakte’n Pathian humhimna an chang tih an sawi a, an tawngtai nasat thu leh Mizorama an unaute pawhin tawngtaipui zel se an duh tih an sawi.
Manipur Synod hnuaia Tuithaphai Presbytery-a executive secretary Rev JF Lalropuia chuan, “Pathian awmpuina leh humhimna kan dawng a, Pathian thiltih mak pawh a thleng nasa,” a ti.
Zo hnahthlakte’n mahni ram an veng a, hmanrua pawh nei mumal lovin thalai an duty tih a sawi a, chuti chunga ram an venghim thei chu Pathian hnathawh a nih thu a sawi. Meitei lam a tam zawk an nih bakah hmanraw tha ber ber nena thawk an nih thu a sawi a, chuti chunga Zo hnahthlakte’n ram an humhim thei hi thil mak a ni tih a sawi bawk.
Thla hmasaa Khamenlok khuaa thil thleng a sawi a, ralthuam kengin Meitei thalai an lut a, an hmuh apiang kap thin an nih thu sawiin, mahse chhum a rawn zing a, nunau an tlanchhuak a, Meitei lamin an hmu thei miah lo tih a sawi. Nunau an chhuah hnuah Zo hnahthlak lam nen an inkap ta a, H Khopibung chu khaw te tak te a nih thu leh Zo hnahthlak lam hi mi tlem te an nih thu sawiin, Zo hnahthlak lam hi a chak zawkah tangin an khua pawh an hum thei tih a sawi.
Thilmak a thlen thin thu leh mipui an tawngtai nasat thu a sawi a, an inkhawm thei lo chungin biak in an hawng a, a duh apiang lutin an tawngtai thin tih te, zing lamah kohhran hrang hrangin tawngtai inkhawm an buatsaih thin thu te a sawi. Tun hnaiah Chawlhniah an inkhawm thei tlangpui tawh nia a hriat thu a sawi bawk.
Manipur-a Zo hnahthlakte hian July ni 25-27 chhungin chawnghei tawngtai buatsaih an tum thu a sawi a, tawngtai pawl panga inthurualin buatsaih an tum tih te, Zo hnahthlakte hian hmun hrang hrangah |awngtai Tlang an neih thu leh |awngtai Tlang hmun hrang hrangah chawngheia tawngtai an tum thu te a sawi.
Mizoram mipuiin lo tawngtaipui zel se an duh tih a sawi a, Mizoram nena inkalpawhna kawng a chhia ang tih a hlauhawm thu, fur lai a ni a, a kawnga hi a la rei lo bawk si a, a chhiat loh nana tawngtai a ngaih thu te, ram vengtute tana tawngtai a ngaih thu te, chaw ei tur siamsak thintute tana dil a ngaih thu te, mipui him nana dil a ngaih thu te a sawi. Doctor leh damdawi an indaih loh thu a sawi a, mipui hriselna atana dil a ngaih thu a sawi bawk.