Zo hnahthlakte’n sorkar thar pawm lo

Manipur-ah sorkar thar a ding a, chief minister tur leh deputy chief minister tur lakluh an ni tawh. Zo hnahthlakte’n sorkar thar hi an pawm lo a, Zirtawpnia total bandh huaihawt tum pawh an awm.
Pawl hrang hrang intelkhawmna Joint Forum of Seven (JF7) te’n Zirtawpni zing dar 6 atanga zan dar thleng total bandh huaihawt an tum a, sorkar thar an dun lohna lantir nan Kuki-Zo chenna hmun pumah bandh hi huaihawt an tum.
February ni 4 tlaiah khan deputy chief minister atana Zo hnahthlak, Kangpokpi bialtu Nemcha Kipgen lakluh a ni a, ani hi Delhi-a Manipur Bhawan-ah a awm avangin, Manipur-a haw lovin video conference hmangin rinawmna thu tiamtira lakluh a ni. Delhi-a Zo hnahthlak hmeichhiate’n Manipur Bhawan kawtah kalin lungawi lohna an lantir nghal a, Nemcha Kipgen-i chu phatsantuah an ngaih thu an aupui.
“Thil kal zel dan tur hriat a har a, pawl hruaitute tan pawh rorel a har ang. Tunah pawh Pi Nemcha-i laka lungawi lohna kan lantir a, keimahni leh keimahni kan inbei chu a ni phawt mai a,” Manipur-a Zo hnahthlak hruaitu pakhat, a hming tarlan rem lo chuan a ti.
Zo hnahthlakte intelkhawmna pawl pakhat Kuki-Zo Council chuan February ni 5 khan thuchhuah an siam a, sorkar thara tel Zo hnahthlak MLA-te chu Zo hnahthlakte ram chhunga ensan tur an ti.
Mipuite hian an buaina chin fel a nih loh chuan sorkar thar din an duh lo a, chutih rualin an MLA-te tel lova sorkar a pian theih tho avangin mi thenkhat ngaihtuahna a phir ve bawk. Zo hnahthlak MLA hi 10 an awm a, an zinga panga chu BJP an ni. Zo hnahthlak BJP MLA pangate tel lo hian BJP hian sorkar an siam thei tho a, chuvangin sorkara tel ve law law a tha tih ngaihdan a awm tih thu dawn a ni.
Manipur atanga thu dawn danin, Zo hnahthlak mipuite hian sorkar thar din hi an duh lo a, mahse an MLA-te hawi lam an hriat kilh kelh rih loh bakah, thuthang a awm reng a, a inthlak reng avangin, a khawi hi nge awiha awih loh tur tih thu-ah an buai mek.
Kangpokpi district lama Zo hnahthlakte dinhmun a khirhkhan lehzualah ngaih a ni a, Naga leh Meitei inkara awm an nih avangin, zin veivah thu-ah pawh harsatna an tawk nasa. Naga lam lungawi lovin kawngpui an dang fo bawk a, thla hmasa mai pawh khan Kangpokpi district paltlangtu national highway chu Naga lamin an dang. Chutiang kara awm chu an nih avangin, sorkar thara tel ve law law hi an tan a tha mai ang em tih ngaihdan a awm thei tih thu dawn a ni.
Churachandpur district lamah chuan Thawhlehni zanah khan village volunteer-te’n sorkar thar din tumna an pawm loh thu aupuiin van lam hawiin silai an hmet puak a, a hnuah chuan thawm a awm zui lo.
Zo hnahthlakte intelkhawmna Kuki Zo Council-in a hmain sorkar thar din tumna an pawm loh thu an lo puang tawh a, Indegenous Tribal Leaders Forum leh Zo United te’n thuchhuah an la nei lo.