‘Zo Hnam Chhan Ni’ hmang
Mizo Students’ Union chuan Zirtawpni khan Govt Mizo Higher Secondary School zirlaite nen ‘Zo Hnam Chhan Ni’ an hmang.
MSU Gen. Hqrs hian September thla chawlhkar hnihna Zirtawpni hi ‘Zo Hnam Chhan Ni’ ah puangin ‘Ram leh Hnam Humhalh’ chungchang inzirtirnaah an hmang thin a, kumin thupuiah ‘Ruihhlo Do’ hmangin Excise & Narcotics inspector Zothantluangi Chenhrang chu thupui sawitu a ni.
Mizoram Excise & Narcotics Department hmalakna sawiin, ruihhlo leh damdawi hmansualin mihring a nghawng leh a khawih pawi theih zia a sawi a. Zirlaite chu ti chhin ve lo tur leh lo tem chhin tawh an awm a nih pawhin a awlsam laia bansan turin a fuih.
MSU president B Lalkhawngaihzuala chuan, Mizote chu hnam tlemte, chimral tham lek, 2011 census-ah mi nuai 9 vel chauh kan la ni tih sawiin, “Hei vang hian kum 2013 atang khan MSU chuan ‘Zo Hnam Chhan Ni’ a hmang tan a. He ni kan hman hian hnamdang nupui pasala neilo tur leh hnamdang sumdawngte laka chimrala kan awmlohna tura rilru put hmang diktak nei turin kan inzirtir thin,” a ti.
Zirlaite chu ram leh hnam hmangaihna rilru pu chunga lehkha zir tur leh Mizo hnam tan taima taka zir tura a fuih bakah MSU chu zirlaite dikna chanvo humhim tura a din zel tur thu a sawi a ni.
He ni pual hian Aizawla hnam dang ILP neilo dapin Mizoram Police nen MSU hi an thawkchhuak bawk a. ILP neilo mi engemawzat man an ni tih sawi a ni.
‘Zo Hnam Chhan Ni’ hmang
