Zo Rimawi International Charity chuan Thawhlehni khan Aizawlah an din champha an lawm.
He hun hmanpuitu Social Welfare minister Er Lalrinawma chuan Mizote chu hmanlai atanga mite tana inpek ngaisang hnam, tlawmngaihna chawisangtu, thian chhan thih ngam hial khawpa midang tana inpezo kan ni, tiin, tunlai khawvelah Mizote chu ringtu kan lo nih hnuin kan zui Isua inpekna entawn chung leh pipu chena kan rohlu, midangte tana inpekna kan chhawmnung zel a, chutiang zulzui chuan Zo Rimawi International pawhin chanhai naupangte tana an inpe chu a chhuanawmin a lawmawm takzet tih a sawi.
“Mahni hlawkna um loa, midangte tana inpe apiang an hlim a, an bula khawsak a nuam thin,” a ti a. ZRI hmalakna chuan naupang engemawzat nun a tha zawngin a khawih danglam tawh a, naupang dang tam tak tan malsawmna an la nih chhunzawm zel a beisei tih a sawi a ni.
Zo Rimawi International Charity pawl hi naupang chanhai, tanpui ngaite tanpui tura din a ni a. School kalna tur neilo naupang 14 an enkawl mek. An zing atang hian naupang 5 chuan HSLC an pass tawh a, pakhatin HSSLC a pass tawh bawk.
Zo Rimawi International-in an pawl din champha an lawm
![](https://theaizawlpost.org/wp-content/uploads/tap_logo-min-large.jpg)