Daily Newspaper

Zofate hlim ni – Remna Ni

42

(A hnuaia article hi Remna Ni puala June ni 30, 2017-a The Aizawl Post-a tih chhuah kha a ni a. July ni 1, 2020-a mual liam ta Upa Rokamlovan, Remna ziah dawn lai vel boruak a sawi chungchang a ni. – Editor)

                   Upa Rokamlova

 

June ni 30, 1986-a MNF leh India sorkar-in New Delhi-a remna an ziah lai khan a hmunah a awm ve a, chumi hmaa remna zawnga an indawr lai phei chu a hmu ve ni mai lovin tha a thawh – a tawnin a tawng. London-a awm Laldenga chah lut turin India prime minister hnenah a ngen a, remna kawng zawn laia a vawi khat nan Delhi khawpuiah Laldenga leh Lal Thanhawla inhmuhna tur a buatsaih bawk. Chu’ng lai chuan minister a ni. Remna ziah a nih hnuah, MNF leh Congress sorkar in\awm a pian theih nan Hiphei leh Liansuama nen an nihna an kiansan a nih kha. Chutianga tha leh zung senga a nihna kiansantu Rokamlova chuan ’tiang hian remna ziah ni chungchang Lalhruaitluanga Chawngte a hrilh:

June ni 30, 1986 kha Zofate hlim ni a ni a, he ni ang hi Mizote’n vawi khat mah kan la tawng lo. Programme, tu siam mah ni lo, amaha rawn thleng thut a ni a, chu programme chu kan hmang vek. Pathian tih a ni. Tun hnuah a sawtute’n a ‘credit’ lak an tum \hin a, hriat fuh loh kan nei a ni.
I duh emaw duh lo emaw, hemi ni hian MNF-in i ai an awh a ni. Hemi ni hian MNF hi Mizo tan an ding. Khawvelin a hriat dan chuan Mizoin ‘independence’ a sual tlat a ni. Mi \henkhatin an sawi fuh theih reng reng loh chu, ‘Mizoin independence kan sual lo,’ an ti leh \hin hi a ni. ‘Laldenga’n a sual lo,’ te an ti a, Laldenga rilru tur kha an ngaihtuah tlat a. Independence kha an sual a, chuta tan chuan thil tih kha a awm. Pressure vangin Laldenga khan a sual a nih pawhin independence chu a sual alawm. Tin, MNF kha kan do lo. A lo do tawk chu eng emaw lai chuan an awm a ni thei e. Mahse tuman kan do lo tiin a sawi theih. Aizawla an rawn luh pawhin kan hek ngai lo. Kan thinlungin independence a duh leh duh loh lam ngaihtuah lo pawhin MNF lam kha kan hawi tlat mai a ni. Chuvangin, indo a lo awm ta a, a buaiate chu keimahni kan ni a, inremna duhtu chu keimahni kan ni. Delhi a buai pha lo a, kan buaina khan Silchar pawh a nghawng lo. A buaiate khan inrem kan duh a, kan duh loh chu inrem loh a ni; inremna mamawhtu chu Mizo a ni. Chuvangin ‘signing of the accord’ thawm kan hriat veleh Mizo zawng zawng kan lawm a ni. He ni ropuizia hi kan hrethiam thei si lo. Engtianga lo thleng nge, eng vanga lo thleng nge tih te kan hre thei lo. He ni aia ropui hi ni dang a awm ang; chanchin \ha thlen ni te pawh a ropui zawk ang. Mahse remna ziah ni anga kan hlim ni chu a awm lo ang. Kha remna kha Pathian tih a ni. ‘Ka tih a ni,’ lo tih tur a ni lo.

He ni lo thlen theih nana thil pawimawh pahnih han sawi ta ila; pakhat chu zalenna sualtute tan rawn let leh a harsa a, an rawn let a nih chuan a lo pawmtuah a innghat. MNF rawn kir kha a harsa a, dinhmun keng tela rawn kir kha a harsa lehzual. A lo awmte tan pawm a ngai. Lal angin an rawn haw a, a phaltu chu government of India a ni. Chu chu Congress party a ni a, amaherawhchu an chhungrilah indona a awm thung a ni. Pawm thei leh pawm harsat an awm. A pahnihna chu political issue a ni a, party issue pawh a ni.

Khatia remna ziah ni khan ka awm ve a, khami ni pawh khan ka vak kual ve nasa a. Amaherawhchu, thil han sawi hi a nuam ta lo riau a, politics-a inbeihna a ni ta zel mai a, thil sawi ngam tawh lo an awm a, a \hen erawh chuan khami ni leh a dawn vela an sawi te pawh an sawi duh tawh lo a, chutiang karah chuan \awng sual te pawh a lo hlauhawm ta a. A ‘credit’ lak kan tum \hin vang a ni.
Kha thil kha mak taka lo thleng a ni a, ‘unseen path’ kan ti dawn em ni, hriat loh kawng kan zawh a, chutia lo thleng ta chu a ni. Home secretary RD Pradhan-a pension-a a chhuah ni takah remna a rawn thleng thut te kha a mak asin. Laldenga thih khan Delhi-a Mizoram House-ah amah thlah turin Pradhan-a hi a kal a, Laldenga nena remna an ziak kha mak a tih thu a la sawi a ni.

Remna kha mipuiin kan duh a, ‘MNF tlawn loh chuan Pu |hena a sorkar leh dawn,’ ti te an awm a. Chutiang karah chuan kan inthlang a, Congress party a sorkar a. Khatah khan Pu Duhoma te, Pu F Malsawma te kha an \angkai khawp mai. Kei pawh college-a ka hna bansanin Congress-ah ka lut a, remna atan theihtawp chhuah a \ul ka ti a, Mizo leh Mizo kan indo ang tein a lang hman a, hetiang te chuan India do lovin keimahni leh keimahni kan indo mai ang tih te pawh a hlauhawm thei hial a. Tichuan min lo sawm bawk a, politics-ah ka lut ta a.

June thla tir a ni ang; thirhrui ka dawng a, Delhi-a kal tura kohna a ni a, meeting pawimawha tel tura kohna a ni. A tirah chuan education thil a nih ka ring zawk a. Chu chuan Pu Hawla, ‘The’ Nghaka, Pu Zalawma, Pu F Lalthlamuana, Pu Liansuama te, Pu Lalhuthanga, Pu Lalkhama te, ka sawi kimin ka hria, anni kha Delhi-ah an awm sa a, kei ka chhuk ve leh a, MNF leh India inbiakrem dan tur kan buaipui a.
Kan mutan chu customary law chungchang leh Greater Mizoram a ni. Customary law chungchangah khan India khan Pu Denga kha an tithinrim a ni, customary law chungchang kha an ‘object’ tlat a. Leilung hausakna Mizoram pual tur tih kha a theih loh an ti bur bawk a.
Remna ziah ni, June ni 30, 1986 bik chu han sawi ta ila. Chawhma lam dar 10-ah a huhovin Buta Singh-a office-ah kan kal a, ani kha union home minister a ni a. Natural resources chungchang kha chu ‘a theih loh’ a ti bur mai a, ‘Customary law chungchang hi chu prime minister thu thu a ni,’ a ti thung a.

Dar 12-ah prime minister kan hmu leh a, khata Rajiv Gandhi kan bia kha, ‘yes or no’ tihna hun hnuhnung tur a ni tawh. Tlai dar 3-ah union home secretary RD Pradhan, khami ni-a pension-a chhuak tur kha thlah tur a ni a, a room-ah khan thutthlengte pawh an rem vek tawh.
Rajiv-a chuan, ‘In tling zo tho ang em tih min hrilh rawh u,’ a ti ta khauh mai a.

Anni ngaihdanah chuan ‘integration of India’ hi Congress-ah a innghat. Congress an sorkar loh chuan India hi a keh ang tih an ring a ni ber. Chu chu remna ni kan sawi hian kan hriatpui lo \hin a, MNF an rawn kir khan Congress an chak loh phah ang tih kha an hlau a ni. Tin, helnain hlawkna a keng tur a ni lo tih kha an ngaihdan bur a ni. Mahse India ngaihdanah chuan ‘rebel should not be rewarded’ tih a ni tawp. Chuvangin, remna ni hi thil theih loh a thlen ni a ni tlat a ni.

Chutah chuan a nia, political issue a nih bakah party issue pawh a ni kan tih. Kha inremnaah khan a pawimawh ber chu government of India a ni a, sorkar ngaihtuahnaah chuan party-in engtin nge a hlawkpui ang tih kha a tel \hin. Rajiv-a pawh chuan MNF hi rawn kir se Congress a sorkar zo tho ang em tih kha a hre duh a ni. “Kan tling zo ang. Mahse nangmah ngei i rawn kal a ngai ang. Tin, Pu Hawla hi in rawn duhsak a ngai. Officer panga sawn tur a tih pawh in sawn lo a,” tiin ka chhang a.
Chumi zawhah customary law kha min sawipui leh ta a.

Rajiv-a hian, ‘You people, in peace sawi hi naupang inkhualtelemna a ang,’ a ti a, ‘Your so called peace is just like a toy,’ a ti. Intelligence report a\anga a lo hriat danin MNF kha 385 chauh an awm tawh a ti a, ‘MNF hi 385 chauh an awm tawh a, original member pawh an awm tawh lo. India tan an huphurhawm loh. Jungle warfare ‘practice’-na tur pawh an tling tawh lo tih hre rawh u,’ a ti a.
Rajiv-a khan experience a nei lo a, politics nek nawk a hre lo.

“Ka pu, Mizo hi kan tlem a, mahse kan inhmangaih a. Mi pakhat a thihin a khua khuain kan buai a, kan inkhawngaih vek. Tunah pawh Delhi-ah thi an awm chuan kan inpui a, harsa tak chung pawhin Mizoramah kan inhawn zel. India sorkar hian kan mite, mi 385, kan hnampui hi that ta ula, kan ngaidam tawh lo ang che u. Chuvangin inremna dawhkan min buatsaihsak turin kan ngen che a ni,” tiin ka chhang a.

“Peace hi i nu hova kan tih a ni a. Aizawlah a rawn kal a, Mizo traditional dress-in a inthuam a, mipuiin an lawm em em a. Peace hi min tiam a, kan tihlawhtling tur a ni. Peace intiama inthlana ding kan ni,” ka’n ti a, “I nuin manifesto min siampui a, peace min tiam a, chuvanga tling chu kan ni,” ka ti. Rajiv-a hmai chu a sen vek a, engmah a sawi tawh lo.
‘He thu hi home ministry-ah va sawi rawh u,’ min ti ta a.
Home ministry-a an joint secretary Vasudevan-a hnenah kan kal leh ta a; customary law chu, Mizoram Legislative Assembly-in a pass loh chuan Mizoramah hman a ni lo ang kan ti a, chu chu kan ‘clear’ ta.

Dar 10-a kan hmuh Buta Singh kha a hnuah MNF lamin an lo hmu a, tiang chuan kan inluh chhawk kual nawk nawk a. Vasudevan-a office a\ang chuan Buta Singh-a hnenah ka va kal leh a, MNF lam chu an lo awm tawh lo a. Pradhan-a office-ah ka va kal leh a, Pu Denga te a lo awm a. “Eng nge in an?” ka’n tih chuan Pu Denga chuan, “Ngawi teh Pu Rokamlo, Greater Mizoram pawh kan la ching fel lo,” tiin min lo chhang a.
Greater Mizoram chu thil hautak tak mai a ni a, a nghawng a thui dawn lutuk a. Inrem loh phah nan hmang ta ila, Pradhan-a a chhuak tawh dawn a ni si. Ani a chhuah chuan mi thar an awm ang a, a bul a\anga tih \hat leh a ngai ang a, remna leh muanna chu a hla leh duai dawn a ni.
“Hei hi chu a har em a, inter state boundary a khawih dawn a,” ka ti a. Tunah mutanah neih ila, inrem loh phah nan hmang ila. Chu chu nge \ha ang inrem hnuah state sorkarin ngaihtuah \hat ni mai se tih te kan sawi dun zuai zuai a. Chumi hnuah Rajiv-a hnenah an kal ta a ni.

Kei chu Vasudevan-a hnenah ka kal leh a, chu chu zan dar 7 vel a ni tawh ang. Ani chuan IP Gupta, additional home secretary hmu turin min lo ti a. Dar 7.30 a pel tawh, ka kal leh ta a. Thingpui min lo ‘offer’ pawh a dai tawh hle a ni. Ban a hun tawh a, Mizoram issue, remna chungchang buaipui vanga awm tura tih an ni a, chuvanga office-a la \hu chu an ni a.

Kan thlen chin, Mizoram chanchin ka sawi a, ani chuan file min khawihsan a. Ka rilruin ka \awng\ai ta a, ka bei hi a dawng em em mai a; “Lalpa, ka va beidawng tehlul em vawiin hi!” ka ti a.
Zing dar 3-ah khan Mizoram House-a ka thlenna, room no 3-ah ka \awng\ai a, chutah chuan vawiinah remna kan nei dawn nia hriatna kha ka nei a. “Tukin dar 3-ah khan i hmaah maicham ka rawn hung a, vawiinah remna kan nei dawn emaw ka ti a. He secretariat atang hian maicham rawn hung an awm tawh em? A hung chhun lah min tibeidawng bawk si a,” ka ti a, Pathian lakah ka vui em em mai a. Jona ang deuh khan ka thinrim a nih chu.

Dar 8.15 vekah phone a ri a, Vasudevan khan min be duh a lo ni a. “Pu Rokamlo, khawiah nge Pu Hawla a awm? Kan inrem dawn. Ko rawh,” a rawn ti a, ka lawm em em mai a. “Khawnge Pu Lalkhama a awm?” ka ti a, “Ka hnenah a awm,” a ti a. Tichuan Mizoram House ka va phone nghal a, Pradhan-a room kan pankhawm ta a ni.

Dawhkan kan kil a, thusawi a awm lo a, chairman pawh an awm chuang lo. Remna chu ziah a ni ta. Mizoram sorkar aiawha sign-tu tur Pu Lalkhama kha ka ball pen var ka pe a, chu chu a hmang a. Ka pen chu State Museum ka pe ta nghe nghe a. Pu Denga chuan, “I pen kha ka lo hmang ve lo a ni aw,” a ti fiamthu zui nghe nghe a.

Pradhan-a room kan thlen khan an lo awm deuh \hup tawh a, keini chu Pu Lalkhama nen kan kal dun a. Tiang chuan rei lo te chhungin remna chu ziah fel a ni ta a, thil han tih vak a awm lo; an sign zawhah kan darh leh nghal deuh mai. Remna ziah hun tak kha dar 8.30 vel, a pel hret ang, chutiang vel chu a ni a, chumi zan chanchinthar atan Doordarshan-in an puang hman chiah.
Chutianga thil lo thleng chu a ni a, a mak asin. July ni 2-ah Rajiv-a inah kan lawm a, thingpui kan inho a. Chutah pawh chuan RAW director chuan mak an tih thu a la sawi a, “A zanah ngei pawh khan kan awih lo,” a ti. A ni reng a, khami ni tlai dar 3-ah khan Pradhan-a an thlah dawn a, dar 3-ah pawh chuan kan la inrem lo. Pu Laldenga’n point tam tak a la nei. Mahse chumi ni chuan remna chu ziah a ni tlat.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy