Daily Newspaper

Zofate hnam khat nih puanna lungphun din dawn

11

Zoram Thar chuan Zofate thlah khat leh hnam khat kan ni tih puanna leh nemnghehna lungphun – ‘Zofate hnam lungphun’ an duan thu sawiin a duan dan tur an sawi bawk.

Zoram Thar hruaitu Dr. Zaichhawna Hlawndo sawi danin, Zofate hnam lungphun tur san zawng hi feet 70 a ni dawn a, hei hian a entir a nei tih a sawi. “Kum 70 chuang British-in Zofate chu rorelna hrang hrang – India, Myanmar leh Bangladesh ah hnam hrang hrang anga min thendarh hun kha a tawp tawh dawn tih a entir a. Republic of India rorelna hnuaia kum 70 (1950-2020) hnam hrang hranga thendarh leh awpbehna ata zalenna dar leh hnam inpumkhatna jubilee dar vuak tan a ni dawn tih a entir a. Zofate chu Kristian kan ni a, Bible-in Israelte sal tanna kum 70 a ral hnuah ka rawn kan leh ang che u a in awmna ngaiah ka dah ang che u, a tih ang khan kan awmna hnam hming diktak – Zofate ah Lalpan min dah tawh dawn tih a entir,” a ti.

Lungphun chung bera Kross awm tur chuan entir a nei leh bawk tih sawiin, “Zofate hnam nihna dik tak innghahna chu Pathian thuthlung – Kalvari tlang Kross-a Lal Isuan a rawn dinah khan a ni tih a entir a; Kross hian Pathian fa ni tlak tawhlo Zofate Pathian fate kan nih leh theihna kawng a rawn hawnna a entir. Kross hian Zofate chenna rama Pathian lal ram ding tur a entir a, Kross banah hian ‘I lal ram lo thleng rawh se’ tih ziah a ni ang,” a ti.

Kross hnuaiah hian khawvel map (globe) a awm dawn tih Dr Zaichhawna Hlawndo hian a sawi a. Zofate chu Bible-in khawvel tana rahchhuah tur hnam a tih kan nihna te, Pathian hnam thlan hnam ropui Kristian hnam leh Kristian ram kan nih turte a entir, tiin a sawi.

Khawvel map hi Zofaten pipute hun atanga eirawngbawl nana thuk kan hman, ‘lungthu pathum’ a do a ni dawn tih sawiin, “He lungthu pathum hian hnam hruihrual pathum atanga hnam hruikhat siam tur a entir a. Zofate chu kum tam tak hnamah kan bo a, tunah chuan hnam hruikhat kan vuan tawh dawn tih a entir ang. Chu hnam hruihrual ban pathumah chuan ‘Zofate’ tih a inziak anga, chu chuan khawvel pum hi Pathian lal ram, Chanchintha hmanga dokang tura Zofate hi Lalpan mawhphurhna a pek hnam kan ni tih a entir,” a ti.

A lai takah lung kilthum nei chhip zum a din tur thu te, he lung kilthum nei inzawm hian Zofate chu tuma tihkeh leh phelh theih tawh loh turin hnamah kan insuihin kan dingnghet tawh dawn tih a entir tur thu te, he lungah hian Zofate hi thlahtu – Zova atanga lo chhuak vek kan nih dan ziah a nih tur thu te, kilthum atangin chi zar peng hrang lo chhuah dan ziah a nih tur thu te a sawi bawk.

“Zofate hi kan lo bo rei tawh avangin chi emaw hnam hming pawh miten min lo phuah sakin keimahni pawhin kan lo phuah hnem tawh a. Mahse thlahtu thuhmun leh hnamkhat Zofa kan nihna hi a pawimawh ber chu a ni ang,” Dr Zaichhawna Hlawndo chuan a ti.

Zoram Thar Zofate Lairelna chuan khawvel pum huap ‘Zofate Haw Runpui leh Hnam Inkhawmpui Thianghlim’ chu 2021 March 26-28 ah Zofate Pathian biak inpui hmun Thenzawl Kanan Vengah neih turin a rel tih Zoram Thar hruaitute hian an sawi a. Haw runpuiah hian hnam lungphun tur a ni. ‘Hnam lungphun hi khawvel puma Zova thlah, Zofate chu thlah khat (one ancestor) hnam khat (one nation) leh unau vek kan ni tih puanna, nemnghehna leh hriattirna tura lungphun a ni ang,” a ti.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy