2013-a YMA General Conference kha Zofate
insuihkhawmna tuipuitu nationalist-te’n an hrechhuak fo ang; Central YMA president tharin Zofate insuihkhawmna kawngah YMA-in theihtawp a chhuah tur thu a sawi a, hemi kawngah hian YMA a tangkai zui reng bawk.
Hemi kumah hian Khawbungah General Conference an nei a, president atana thlan tlin chu Lalbiakzuala a ni. Ani hian Zo hnahthlakte insuihkhawmna atana YMA-in theihtawp a chhuah tur thu a sawi nghal.
Mara thalai pawl (M|P) leh Lai thalai pawl (YLA) te nen Central YMA-in hun an hmang zui a, 2016-a Bairabi-a YMA General Conference-ah M|P leh YLA hruaitute an tel a ni mai lo, thu an sawi.
2015 kum tawp lamah vanduaithlak takin Myanmar leh Manipur-a Zo hnahthlakte’n tuilian leh leimin an tuar a, YMA-in Mizoram state chhungah vehbur a khawnsak. YMA hruaitute’n a hmunah kalin an han hlan a, president pawh a han kal.
2016 October-ah YMA Rorel Inkhawmpui an nei a, chuta an thurel chu “Zo hnahthlakte tun aia kan inpumkhat lehzual theih nan Central YMA-in hma la rawh se,” tih a ni. Hemi tum hian chutih laia Central YMA president Lalbiakzuala chuan, “Central YMA chuan Zo hnahthlakte inpumkhat leh inthurual taka kan awm theih nan hma a la mek zel a,” a ti a, “Myanmar-a kan unau Zo hnahthlak tuilian tuar leh Manipur-a leimin tuarte puala ram puma sum kan thawhkhawm cheng nuai 120 vel khan inpumkhatna leh inngaihsakna kawngah YMA-in nasa takin tan kan la tih a tichiang. Khang kan tanpuina pek avang khan Myanmar-a kan unau tuilian leh leimin tuarte biangah lawm avangin mittui a luang asin. Kha vehbur khawn khan sual kan dohona turah te thil dik lo titu leh thil tha lo titu kan dem rawnna turah te, kan inpumkhat zelna turah te ngaihtuahna thar min siam zel sela ka ti tak zet a ni,” a ti bawk.
Chung chu nationalist-te titi a la ni a, YMA-in hmun hrang hranga Zo hnahthlakte en hrang lova an tana ke a pen kha hmuhnawm an ti.
Hruaitu tharte pawhin Zo hnahthlakte insuihkhawmna atan ke an pen a, Mizoram state pawna Zo hnahthlakte’n harsatna an tawh pawhin YMA-in an tan theihtawp a chhuah thin. Pawl lian leh chak an ni a, YMA hmalakna hi tun hnaiah Zo hnahthlakte insuihkhawmna atan a hlawk hle.
Mizoram leh hmun dangah YMA branch 820 a awm a, member hi mipa 2,76,689 leh hmeichhia 1,97,183, an vaiin mi 4,73,872 an awm mek.
Zofate insuihkhawm nan YMA
