By Reuben Lalnunthara Hnamte
Mizote hi kan thlahtu leh kan tobul tak hi chhui fiah hleih theih a nih lohna chin a awm a. Chhinlung chhuak kan ni tih hi tun thlenga kan sawi dan fo a ni a. Kan naupan laite pawhin chhinlung atanga kan lo chhuah dante kan zir thin a ni. Hun a lo kal zel a, Israel thlah kan ni a, hriatna leh chhuina te a lo awm a, an han chhui tak tak chuan ni awm tak pawha inngaih theih turin an chhui a, a finfiahna nen lam an han tarlan chuan kan ni awm mange tih mai tur a ni. Kan hmel leh pianhmangah chuan China lam pang, khawchhak lam kan pawl a, a thenin Mongolian thlah kan ni tih te, China lam thlah kan ni tih te leh a dang dang a awm nual a, mahse, he lam hi chu tun tumah hian kan chhui tum a ni lem lo. Israel thlah ni a inngai tam tak chuan Israelah min pemsan tawh a, a pem ve lem lo, Israel thlaha inngai tho kan awm bawk. Chiang faka chu mite thlah kan ni ti a, a mipui nawlpuiin kan pawm erawh awm chiah lo niin a lang. A pawimawh ber chu mizo kan ni a, mizoah hian hnam peng hrang hrang kan awm tih erawh a chiang hle.
Zofate insuihkhawm pawimawhzia leh tulzia lo tlangaupui tawk pawh mi tam tak kan awm a. Ka pu Capt.LZ.Sailova ngei pawh khan Zofate insuihkhawm lam kha tuipuiin, hla te hial a lo phuah a ni. Zofate pawh kan lo changkang chho zel a, khawvel ram hrang hranga awm pawh a sing tel kan lo awm tawh. Europe, America leh Asia, Middle East thlengin kanin zarpharh a, intihlim tham pawh kan lo awm ve ta nual mai. Hmanlai kan mizo zawlnei kan tih ten Mizoram hmabak leh kan awm dan turte an lo puang a, tunlaiah pawh mi tam tak chuan kan tlangaupui nasa in, lo thleng dik te pawh a awm ta nual ni tein a lang. Hengte avang hian mi thenkhat phei chuan Kohhran hial chhuahsan a, kohhran thar din a, pemkhawm ta ruih ruih pawh sawi tur an awm thin a nih kha. Tun laiah pawh hian Zoramthar, a hnam ang zawnga tuipui kan tam hle a; Pastor chhawna te, Zawlnei Saikhuma te thu lo sawite pawh huai tak tak a tlangaupui pawh kan awm ta nawk a ni.
Zoramthar lo thleng tur a ni emaw, zawlneite thusawi lo thleng dik tur a ni emaw pawh nise; kohhran lo chhuahsan a, lo inlakbing kher erawh a tulna a awm ber lo. Zofate tana kan inpui, Jerusalem chu Mizoram hi a ni ka ti ve tlat. Tunah pawh hian mak taka hruaikhawm kan ni mek a, inhmangaiha insuihkhawm a hun tawhzia hi Pathianin min hriattir niin ka ngai. Tunah Burma atangte, Bangladesh leh Manipur atangin mak takin min huikhawm a, hei bak khawvel hmun dang atang pawh hian min hruaikhawm lovang tih tunge sawi thei? Hmanlai atang tawhin mak takin harhna thlarauvin min tuam thin a, a khat tawkin kan ramah hian harhna a thleng emaw tih mai tur a ni. Khawvel hmun dangah hian keini ram anga a khat tawka Pathian thlarauva harhnain a nuai hi an awm ve awm kan hre lo. Kohhran hrang hrangin zingtin tawngtai inkhawm kan nei a, kohhran rawngbawlna lah kohhran tinin kan theih ang tawkin kan kalpui a, zan awl awm mang lo khawpin Pathian tan kan inhmang a ni.
Sualna a pung a tam ta kan tih rual hian Pathian mi leh tawngtai thlahthlam ngai lo mi hi an va tam em! Kohhran tinin Camping, retreat, crusade kan nei reng a, Pathian biakna lah a rawngbawlna hi thlah lovin kan kalpui reng a ni. Tawngtaina tlang (Prayer mountain) ah te hian ni tin thalai leh nu leh pa Pathian autu an kal reng a, chaw ngheiin kar khat te, a aia reite inserh hrangin Lalpa an au thin a ni. Kohhran leh pawl ho an kal reng bawk. Heng Pathian autu leh duhtu, kan ram tana tawngtai thin mite avang hian Pathian hian Zofate hi min theihnghilh lo a ni. Pathian ringtu kan nih avanga tuarna leh endawngnate pawh kan state thenawmah te kan tawk reng chungin, thahnem ngai taka thawktu sang tam tak kan nei a ni. Tun laiah hetiang taka kan State thenawma buiana leh harsatna lo thleng ta hi Pathian hian Zofate hi insuihkhawma ama tan nung tur leh inthuruala Pathian tana rawngbawl turin min duh niin ka hre ta ber mai.
Kan ram riangte hi zofate inpui leh kan hawkhawmna tur a nih miau avangin kan lo inbuatsaih sauh sauh pawh a tul hle mai. Tun bak pawh hi ala awm dawn chauh maithei a, Zo hnahthlak hrang hrangte tana kan inpui chu Mizoram hi a ni tlat a, chuvangin kan unau harsatna tawka lo tlankhawmte lo kuangkuaha lo tanpui hi inpuia lo awm te hian kan mawhphurhna a ni. Chutih rualin thenkhat sual khawihna remchanga lo hmang tawk pawh an awm ngei ang, heng mite avang hian hnual mai lo ila; a sual ai hian a tha an tam fe zawk tih hi i hrereng teh ang u. Pathian hian Zofate hi insuihkhawma tangrual turin min hruaikhawm mek a ni. Thil mak ve angreng tak chu- zo hnahthlak kan tih te hi Kristian kan ni deuh zel hi a ni. Zo hnahthlak chiang tak zingah milem bia, sakhaw dang hriat tur an awm a nih pawhin an tlem khawp ang. Mizoteah hian Pathian hian tum engemaw a nei a ni phawt ang; chuvangin Pathian lawmtlak ni tura, kan intihthianghlim a, dik tak leh rinawm taka rorelna kalpui a, kan state thenawm leh khawvel ramdangte atang pawha entawntlak ni tur khawpa tan kan lak hi a hun ta khawp mai.
Hawh u zofate hian tangrualin Pathian i au ila, engkim titheitu Pathian chuan kan tawngtaina min chhangin min tithlawn ngai lovang. Amah hnaiha, theihpatawpa a tana thawktute hi Lalpa hian min ensan dawn lo. Zofate hi kan tanruala, pheikhai vawra zaa lungrual taka ke kan pen ho chuan hnam chak tak leh thiltithei ni turin Pathian hian min din ngei dawn a ni.
ZOFATE JERUSALEM MIZORAM
