Manipur-a Zohnahthlak leh Meitei inkara buaina a chhuah hnua kawng hrang hranga Zohnahthlakte chunga hleilenna leh rorelna khai rual lo lutuk duhlohna lantirin Nilaini khan Lamka Churachandpur-ah kawngzawh huaihawt a ni.
Indigenous Tribal Leaders’ Forum (ITLF) huaihawta kawngzawh hi hmun thum atanga bul tan niin, Zohnahthlak hnam peng hrang hrang zirlai pawlte an tel a, Peace Ground Tuibuong-ah intawhkhawm a ni. Hetah hian ITLF bakah Zo United leh Zomi Council (ZCSC) aiawhten thu an sawi a. ITLF hian Churachandpur district bawrhsap Dharun Kumar kaltlangin Union Home minister Amit Shah leh Central Bureau of Investigation (CBI) director Praveen Sood hnenah pek tur lehkha, memorandum an hlan nghal a ni.
Union Home minister leh CBI hotu hnenah hian kumin May 3-a tlangmi leh Meitei inkara buaina chhuah hnua Zohnahthlakte chunga hleilenna hrang hrang, rawng taka sawisak, pawngsual, rukbo, thah, an chenna in tihchhiat leh an thil hlu laksak an nih dan hrang hrang chipchiar takin, an hming leh a thil thlen ni nen an ziaklang a. Manipur Police ralthuam dahna rawka ralthuam rukbo a nih dan te, Meitei volunteer lamah hian Manipur Police (Meitei) mi an tel ngei nia a lan dan leh finfiahna te an thlen a. Meitei mi rukbo leh thah chungchanga a mawhphurtu nia puh Zohnahthlak mite CBI leh NIA lamin awlsam tak leh tanchhan mumal pawh awm loa an man mai theih lai a, Zohnahthlakte chunga hleilen leh an nunna laksak a nihnaa, finfiahna tha tak awm chunga Meitei lam mi rinhlelh man emaw pawh awm loa zalen taka an la awm thu te an thlen a ni.
Manipur-a chi leh chi buainaah hian thu lai la taka boruak tidai leh hmetmit zawnga rorela hma la turin an ngen tih an thlen.
Zofate laka hleilenna duhlohin Churachandpur-ah kawng zawh
