Tun hnaiah Manipur-a Zofate leh Meitei kar a lum thar leh a, hmun hrang hrangah thil duhawm lo a thleng. A lehlam lehlamin \anhmun an siam leh a, inralring rengin an awm tih thu dawn a ni.November ni 7, kar hmasa Ningani khan Jiribam district-a Zairawn khuaah nu pakhat Zosangkim Hmar chu Meitei-in rawng takin an tihlum a, hei hian boruak a tisa mek.
Zairawn hi Hmar khua, in 70 vel khua a ni a, nikum lama an buai tirhah pawh khan engemaw zat chu an lo tlan chhuak tawh. Boruak a daih hnuah engemaw zat an kir leh a, nunna chan ta pawh hi kir leh zinga mi nia hriat an ni.
Thu dawn danin, Meitei lamin a keah an kah fuh avangin a insaseng thei lo a, chumi hnuah rawng taka an sawisak bakah an in pawh hi an hal a ni.
He thil thleng duhawm lo tak hi hmun hrang hrangah a kang kai a, Churachandpur district-a Zo hnahthlakte pawh an inralring tha leh nghal.
Churachandpur district-a Zo hnahthlak, Meitei hnaih khuate chu chawl lovin an la ‘duty’ reng tho a, kar hmasaa thil duhawm lo a thlen vang hian an duty ngawrh thar leh tih thu dawn a ni.
Jiribam district leh Churachandpur district inkarah Pherzawl district a awm a, anni pawh hi ‘duty’ sa reng an ni. Tun hnaiah an inralring thar lehzual a, chutiang bawkin Kangpokpi district-a Zo hnahthlakte pawh an inralringin an awm. Kangpokpi district lam hi chu an boruak a daih deuh lai pawhin inbeih zeuh zeuh a awm reng tho a, kar hmasa thil a thlen hma pawh khan Meitei nena inep leh inbeih a awm fo.
Churachandpur district atanga thu dawn danin, hmun hrang hrangah an insang mar a, Meitei nena inhnaih khaw thenkhatah chuan inep leh silai hmeh puah te pawh a awm.
Jiribam district-ah hian Zofate khua hi 12 vel a awm a, a tam ber chu Hmar niin, Thado Kuki leh Paite te an awm bawk. Anni pawh an insang mar tha leh a, mahni khua vengin ngawrh takin an duty mek.
Zofate leh Meitei kar a lum leh
