Zofate thlavang hauha tang ral raih ngam K Vanlalvena chu Lok Sabha MP atan vote turin mipui a ngen tih MNF senior vice president Dr R Lalthangliana chuan a sawi.
MP inthlan atana campaign-a chhuak MNF senior vice president hian Kolasib district-a hmar tlangdung a tlawhnaah, thenawm state Manipur buainaa Kristian biak in 300 chuang hal an ni kha Parliament House-ah MP Pu K Vanlalvena’n a auchhuah pui nasa hle a. Hetiang thil hi communist ramah pawh thil thleng ngai lo a ni, tiin, “Zofate thlavang hauh tura tang ral raih ngam hi kan MP candidate neih zingah Pu K Vanlalvena chiah hi a ni awm e,” a ti.
MP inthlanah ruling MP candidate an tling vek reng kher ngai loa, vawi 4 chu ruling MP candidate an tla tawh tih a sawi.
“Pu K Vanlalvena hi a chanchin sawi vak ngai loin mipuiin kan hria. India ram rorelna khawlah Mizo zingah amah tluk an awm lo. Myanmar nena ramri hung tum chungchangah Zofate tan nasa takin hma a la a, tunlai khawvelah chuan a ni tluk an awm loa, enchhin ngai ve lo, mi hriatsa a ni,” Dr R Lalthangliana hian a ti.
Tunhnaiah Serlui bial Saipum khuaah hmunphiah thar sa kudam-ah an dah nghuk nia sawiin, ZPM sawrkar chuan lei tura an intiam anga an lei sak loh avangin mipui rinna an tichhe mek tih a sawi.
Zofate thlavang hauha tang ral raih ngam MP-ah vote ang – Dr R Lalthangliana
