Zohnahthlak hnam hrang hrang chu Mizo vek kan ni a, kan tawng humhalha hman uar deuh deuh a tul tih adviser to CM (Political) Lalmuanpuia Punte chuan a sawi.
Tuichangral Zirlai Pawl (TCZP) chuan January 6 & 7 chhung khan Sailulakah General Assembly vawi 11-na a hmang a. Thawhlehni chhuna vantlang inkhawm hmanpuitu, Hrangturzo bialtu MLA ni bawk Lalmuanpuia Punte chuan, Tuichangral mipui chu Mizo hnam Mizona vawngnungtu tha an ni, tiin, chu ze tha tak chu vawngnung zel turin a fuih.
Zohnahthlak hnam hrang hrang chu Mizo vek kan ni a, kan tawng humhalha hman uar deuh deuh a tul tih sawiin, “Kan hnam thuam hrang hrang pawh chawinung a, keimahni ngeiin inbel tama kan ngaihsan thar a tul hle a, hnam dang zingah pawh vawrh lar kan tum tur a ni,” a ti. Khawpui inngaihsan siakna tibo a, thalaiten mahni khawchhuahna leh seilenna hmun ngaihhlut nachang kan hriat thar a tul hle tih a sawi a. Khawi hmunah pawh taima taka kan thawh chuan eizawnna tur a awm a, sawrkar policy – hand holding hmang tangkaia entrepreneurship lamah tan lak a tul tih a sawi bawk.
TCZP inkhawmpuiah hian uaptu atan MSU Gen. Hqrs president B Lalkhawngaihzuala chu hman a ni a. Inkhawmpui thupui “Tuichangral hmasawnnan zirna uar” tih chu asst. professor chuan David Lalrinchhana chuan a sawi a ni.
Essay inziahsiak neih a nih bakah hnam lam intihsuak neiin, zan lamah palai thlahna leh concert neih a ni.
Tuichangral Zirlai Pawl huamchhungah hian khaw14 a awm a, General Assembly-ah hian palai 200 vel an riaklut a ni.
Zohnahthlak hi Mizo vek kan ni – Lalmuanpuia Punte
