Zohnuai lei tlahniam thawm
thatna atan cheng vbch. 3 dah
Vaivakawn Zohnuaia lei tlak hniamna hmun thawmthat lehna atan sawrkar chuan cheng vaibelchhe 3.84 a ruahman tih minister Lalnghinglova Hmar chuan a sawi.
Aizawl West II bialtu MLA ni bawk Lalnghinglova Hmar hian Zohnuaia lei tlak hniamna hmun hi Ningani zing khan a tlawh a, vengchhung mite nen inkawmin sawrkar hmalakna a hrilh. Helai hmuna lei che thin hian vantlang kawng a tih chhiat bakah Vaivakawn Thlanmual atanga Sairang Road (NH-6) thlengin a awh thla a ni.
Vaivakawn Zohnuai lei tlahniam thin siamtha tak tak tur chuan a bulthut, lui dung atanga lei tawlh tur danna check dam siam a ngai tih minister hian a sawi a. Thil hautak tham tak a nih avangin tun dinhmuna thil tih theih awm chu chhiatna zualpui thleng thei laka invenna tura hma lak a ni tih a sawi.
DM&R, PWD leh Geology & Mining Department-te hmalakna sawiin, Zohnuai lei tlahniam thawmthat atan hian SASCI atangin cheng vaibelchhe 3.84 hmuh a ni tawh a, tui kawng mumal zawk, side drain leh linked drain, Gabion leh retaining wall siama a rang thei ang bera hma lak nghal a ni dawn tih a sawi a ni.
Geology & Mining department-a geologist Malsawmdawngliana sawi danin, Zohnuai lei chet dan hi DGPS khawl hmangin an thlithlai reng a, lei (soil) sakhat dan pawh zirin, hmun 6-ah lei an verh (bore hole) a, hmun thenkhatah chuan lei hnuai feet 50 velah lei sakhat an hmu chauh a ni.
Zohnuai lei tlahniam thawm thatna atan cheng vbch. 3 dah
