Daily Newspaper

ZOMEDPLANTS

7

State Medicinal Plants Board chuan Angel Business Promoters-te nen tangkawpin Mizoram chhunga ramhmul damdawi siamchhuah kawngah hma lak an tum a, chumi denchhen chuan nimin khan health minister chuan ZOMEDPLANTS a tlangzarh a. He ZOMEDPLANTS hi ramhnim atanga ramhmul damdawi chi hrang hrang siamchhuah chhinchhiahna tur (brand name) a ni a. Ram hnim atanga ei leh in mai theih tur siamchhuahte Zomedplants hming hian mipuite lei theih tura zawrh chhuah a ni dawn a. Health minister chuan, COVID-19 vangin thalai tam tak phai lama an hna thawk chhunzawm thei lovin an lo haw a, anni tan pawh hmalakna remchang leh entrepreneurship lama min ti thangharh lehzualtu a nih a beisei thu sawiin, Pathianin thei leh ramhnim hmanga malsawmna tam tak kan rama min pek hi a tangkaina kan phawk chhuak thei a nih ngat chuan nasa lehzualin min petu hian malsawmna in min vur belhchhah ngei ang, tiin a sawi nghe nghe a ni.

Hetianga kan ramin hausakna kan neih mek ramhmul damdawi medicinal plant hmanga hmalakna tur a awm ta hi a lawmawm hle a. Kan hriat angin, RS MP Pu K. Vanlalvena chuan parliament-ah pawh ramhmul damdawi chungchang hi a lo auchhuahpui tawh a. Tuna Mizoram chhunga hmalakna kal mek tur nen hian khangte pawh kha hmehbelin hmalakna lian tak kalpui theih a nih a rinawm.

Mizoramah hian thalaiten hna thawh tur an hriat loh avangin, state pawn lama hna zawng turin kan fuih thin a, hei hi a that rualin, keimahni ram chhung ngeiah pawh thalaite tan hian hnathawh tur hi a tam hle a, chu chu kan siam thiam leh siam thiam lohah a innghat ve bawk awm e. Tuna Medicinal Plant chungchangah pawh hian, sawrkar hian thalai thluak tha tak takte hi chhawr tangkai dan a ngaihtuah a, a kawng an sih hawn hi a pawimawh ve bawk. Kan hriat angin, tun hnaia India Today-in ‘most improved’ state zinga min dahna category chu ‘entrepreneurship’ kha a ni. Medicinal Plant lamah hian chona (chalenging) a lian hle a. Kan ram hi khawvel huap pawha biodiversity hotspot zinga tel a ni pha a, kan ram leilunga khuarel thil rohlu lutuk, tihchingpen meka a awm hi kan humhalh a, a ral zel loh nana kan humhalh thiam a ngai a. Chu chu kan thalai hnathawh tur nei mai lote tan hian kan sihhawn thiam a pawimawh tawh hle a ni. Ram changkang tam takin an innghahna hi ‘human resource development’ a ni a, thil ti thei tura mihring chherchhuah lamah hian tan kan lak a hun ve tawh takzet a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy