Manipur-a Zohnahthlakte thlavang hauh leh an tawrhna tawrhpuina kawng zawh, Mizoram puma neih a ni chu lawmawm an tih thu Zomi Council Steering Committee chuan an sawi.
Zomi Council Steering Committee (ZCSC) thuchhuak chuan, Manipur Zohnahthlakte tawrhna, Meitei hoin Zofate thah chimih tuma in leh lo Imphal leh a chhehvel bakah hmun hrang hranga an suasam avanga Zofate thlavang hauhna, NGO Coordination Committee hmalakna hnuaiah Mizoram dap chhuaka kawng zawh ropui tak July 25-a huaihawt leh buatsaih a ni chu thinlung leh tih takzetin Mizorama Zofate zawng zawng chungah lawmthu a sawi tih a sawi.
‘2023 May 3 atanga vawiin thlengin Mizoram sawrkar, NGO leh Kohhran hrang hrangte Manipur Zofate thlavang hauhna chhenfakawm taka kalpui chhoh zel avangin Manipur Zofate kan thlamuang takzet a. Zohnahthlak hmeichhiate
thianghlimna tih bawlhhlawhin a awm mek a, mihring pangngai piahlama Meira Paibi, Meitei Leepun leh Arambai Tenggol chetna hian khawvel pum a dengchhuak a, Pathianin kohhrante tawngtaina min chhang ngei a ni tih kan hria a ni,’ a ti.
Manipur Zofate thah chimih na tura kawng engkim kalpuitu, Manipur chief minister N Biren Singh leh a kaihhruaite an dem tih ZCSC hian sawiin, Manipur Zofate buai tirh atanga vawiin thlenga separate administration an hmuh theihna tura theihna zawng zawng chhuaha tangte chungah an lawm tih a sawi a. A tawp thlenga tang tlang zel turin an tih a sawi bawk.
‘Tun hnu zelah pawh Zofate zawng zawng tangrual a, inpumkhata nasa taka tan la chhumzawm zel turin kan ngen a. Manipura Zofate inhumhimna tur leh rorelna hrang kan neih theihna turin hmalakna tluang taka kalpui kan duh takzet a; chumi atan chuan Pathian hruaina kan mamawh avangin tawngtaina nen, kan zavaiin tang tlang zel ang u,’ ZCSC chuan a ti.
Zomi Council-in lawmthu sawi
