Zonu ‘Project 50’ lawmman sem

ZPM Zonu Hqrs-in member inzawnna kawnga hma an lakna ‘Project 50’ chu Thawhlehni khar a ni a, unit titha zual hnenah lawmman sem nghal a ni.
ZPM Zonu Hqrs president R Lalawmpuii sawi danin, Project 50 hi kumin September 7 khan Sakawrtuichhunah an khuhhawng a. ‘Project 50-in a tum ber chu, hawn a nih atangin Inrinni leh Pathianni chhiar tel loin ni 42 chhung ZPM member thar hlak mi 50 aia tlem lo, Aizawl khawpui chhunga ZPM Zonu Unit tin-ten hmuh an tumna a ni. “He project hi inthlanpui kan neih zawh takah pawh khan a tangkai hle a. Politics-a inhmang ngai lo hmeichhe tam tak khawrh chhuahna hmanraw tha tak a ni,” a ti.
Project 50 a hlawhtlin theihna tura rim taka thawktu Zonu Unit hruaitute chungah Zonu president hian lawmthu a sawi a. Lawmman tumtu ZPM working president Pu K Sapdanga chungah lawmthu sawiin, ZPM Zonu Project a hlawhtlin theihna tura phurpuitu ZPM Gen. Hqrs. hruaitute chungah lawmthu a sawi tih a sawi a ni.
Project 50 kharnaah hian ZPM president Lalliansawta, ZPM leader Lalduhoma, ZPM working president K Sapdanga leh vice president Dr Kenneth Chawngliana ten thu an sawi a, Project 50 titha zual unit pathum hnenah lawmman pek an ni.