Zoram buai behchhan film siam

Mizoram buai behchhana Mizo film siam ‘Ambush – a war story’ tih chu Ningani zan khan chief minister Zoramthanga’n Aizawlah a tlangzarh.
Chief minister chuan Ambush film chu a hming mai pawhin a lung a tileng tih sawiin, underground-a an awm lai behchhan film an lo buaipui ve tawh dan leh film siam hautak zia a hriat ve thu a sawi a. Rambuai film tha tak hmuh tur a awm ta chu a buatsaihtute an chhuanawm hle, tiin, “Thangtharten kan nu leh pa, kan pi leh puten ram chhan nana an lo tawrh nasat zia kan hmuh theih phah dawn a ni,” a ti.
Film industry lamah Mizoten hma kan sawn zel chu lawmawm a tih thu a sawi a. Hmalam hun eng tak pawh kan nei tih hria a, nasa zawka bei zel turin a sawm tih a sawi a ni.
He film director Mapuia Chongthu (Leitlang Pictures) chuan he film siam duhna hi kum 10 kalta atang tawh khan a nei a, mahse sum leh pai a duh hautak avangin tlin a inti loa. Tlem lai khan Serchhipah thawhpui tur tha tak, rambuai history lama doctorate degree nei Dr Zarzosanga a chhar a. Ani’n script tha tak a ziahsak a, a bul an tan thei ta tih a sawi a ni. A changtute inpekna a thuk em em a, an zarah he film hi a puitling thei tih a sawi.
“Rambuai hre pha lo thangthar tam tak kan awm tawh avangin he film hi entertainment rilru ringawt pua siam a ni loa, rambuai chanchin inzirtirna film pawimawh tak ni ah ka ngai,” a ti.
He film-ah hian lemchan thiam mi 70 vel an inlan a, Mizorama film siam tawh zinga sum senna sang ber nia sawi niin, darkar 2.50 a sei a ni.