Zoram leilung atanga
thar tam ber balhla
Mizoram leilung atanga thlai leh thei chi hrang hrang tharchhuah zingah balhla chu thar tam ber a ni a. Kum 2022 khan Mizoram puma balhla tharchhuah zat chu metric tonne 140.50 a ni.
Economics & Statistics department-in an tihchhuah thar ber Statistical Handbook 2022-a Horticulture department record tarlan a nih danin, kum 2022 khan Mizorama balhla chinna hmun zau zawng hi hectare 11.68 a ni a; chawhrualin hectare khat (metre 100 bial) ah balhla metric tonne 12.03 (kg. 12030) zel thar ang a ni.
Balhla hi Aizawl district atanga tharchhuah a tam ber a, balhla tharchhuak tam zual khua chu – Khumtung, Thingsulthliah, Baktawng, Sesawng leh Darlawn a ni. A district ang zawng chuan Aizawl dawtah Serchhip leh Kolasib district-in an tharchhuak tam bawk.
Balhla tharchhuak tam Khumtung khua hian 2016 November 30 khan ‘Balhla Kut’ an lo hmang tawh a. Khatih lai khan chhung tin deuhthawin balhla an ching a, chawhrualin chhungkaw tinin balhla kung 600-700 nei ang an ni a; kung 2000 nei te pawh an awm. Khumtung khua hian balhla atang hian kumtin cheng nuai 200 chuang an lalut ziah anga chhut a ni.
Thei tharchhuah tam ber dawttu chu serthlum niin 2022 khan hectare 16.57-a zauah metric tonne 54.17 tharchhuah a ni a. Hectare khat zelah serthlum metric tonne 3.27 (kg.3270) thar ang a ni. Serthlum thar tam district hi Serchhip, Lunglei leh Mamit an ni.
Serthlum dawtah hian lakhuihthei chuan Mizoram thei tharchhuah tam lamah a pathumna a hauh a. Kum 2022 khan hectare 5.03 a zauah metric tonne 29.02 tharchhuah a ni a; hectare khat zelah lakhuihthei MT 5.77 (kg.5770) tharchhuah ang a ni.
Thlai (vegetables) zingah zikhlum chu Mizorama tharchhuah tam ber a ni a. Kum 2022 khan hectare 3.87-a zauah metric tonne 88.53 tharchhuah a ni a. Hectare khat zelah zikhlum MT 22.86 (kg. 22,860) tharchhuah ang a ni.
Zikhlum dawtah tomato niin kum 2022 khan hectare 2.80-a zauhah MT 27.13 tharchhuah a ni a. Hectare khat zelah MT 9.69 (kg. 9690) tharchhuak ang a ni.
Thlai zingah hian a pathumna hauhtu chu bawrhsaiabe (Okra) a ni a. Kum 2022 khan hectare 3.63-a zauah MT 25.02 thar a ni a; hectare khat zelah MT 6.88 (kg. 6880) tharchhuak ang a ni.
Thlai hmuihmer (spices) zingah tharchhuah tam ber sawhthing chu hectare 8.55-a zauah metric tonne 60.13 tharchhuah a ni a, hectare khat zelah MT 7.03 (kg.7030) tharchhuak ang a ni. A
Mizoram tharchhuah top 5
A tam dan indawtin
Fruits Vegetables Spices
1. Balhla Zikhlum Sawhthing
2. Lakhuihthei Tomato Aieng
3. Serthlum Bawrhsaiabe Hmarcha
4. Lemon Bawkbawn Purunvar
5. Thingfanghma Capsicum Black Pepper