Thawhtanni khan MZP-in Zoram Ni an hmang a, he huna khuallian, Rajya Sabha MP K Vanlalvena’n Zoram independent chungchang sawiin, a lo thlen mai a rin thu te a sawi.
March ni 5, 1966-ah India sipaite’n jet fighter leh bomb hmangin Aizawl an bei a, a champhaah MZP hian Zoram Ni an hmang thin. Kuminah March ni 5 hi Chawlhni a nih avangin Thawhtanni-ah an hmang a, he huna khuallian chuan Zoramin zalenna a sual laiin mi hrang hrangin an tuar tih te, a nawlpui tuarah chuan March ni 5-a thil thleng kha a na ber a nih a rin thu a sawi a, “India pawhin dan a bawhchhiat nasat ber ni,” tiin a sawi.
“An lo tawrhna chu inpendence a ni a, chuvangin independent tum tawh lo ang maia lo awm hi a dik lo a ni,” K Vena chuan a ti a, “Parliament House chhungah pawh sawi tul se ka sawi hreh miah lo tih hi ka sawi duh a ni,” tiin, “India-ina a chelh hlen theih hi kan ni dawn miah lo,” a ti bawk.
Hnam tana tuartute tuarna hriatchhuah fo a tul tiin a sawi a, hnam tana tuartute tuarna ngaihtuah chhuah apiangin hnam rilru kan pu thar tiin a sawi.
“Chuvangin, kan va hriatchhuah fo loh chuan, keimahni leh keimahni, party-a inbeih vak vak te, mimal intlansiak te a awl em em a,” tiin a chhunzawm a ni.
“Kan hnam min hruai tumna, Pathianin a nei a ni tih hi zep tur a awmin ka hre lo,” a ti a, Myanmar-a Zofate’n Myanmar buai an tuar tih te, Bangladesh-a Zofate pawhin an tualchhung buaina an tuar tih te sawiin, Mizoramah an tlanlut tih a sawi a, hei hian unau inzawmna a tithuk niin a sawi.
“Kan lo inpumkhata kan lo inauva kan lo inzawmkhawm theih nan hetiang thil hi a thleng a ni tih hi a rinhlelhawm lohvin ka hria,” a ti.
MZP president Lalnunmawia Pautu pawhin thu a sawi a, Zoram Ni chu nationalism lam inzirtirna hun a nih thu a sawi.
Japan-in atomb bomb an tuar ni August ni 6-ah a hriatrengna hun an hmang thin a, USA pawhin 2001 November ni 9-a World Trade Centre beih a nih champha an hmang thin tih te a sawi a, March ni 5, 1966-ah Aizawl khawpui chu meivap-ah a chang a, mipui an thlabar tih te sawiin, khami ni-a Zoram tuarna kha theihnghilh chi a ni lo tih a sawi.
“Zofate inpumkhatna niah he Zoram ni, March ni 5 hi hmang zel ila tih hi MZP duh dan a ni,” Nunmawia chuan a ti.
Zoram Ni-ah MP-in Zoram ‘independent’ chungchang sawi
