Daily Newspaper

ZORAM PAVALAITE

23

-Vidpuia Hrahsel

Hmel en reng pawha pavalai rual pha lo, vanglai nun hmang chho mek he thatlai nun hmang mek vala hian ka pa rual te, nakin lawka ka pawl telna tur Pavalai pawl chungchang thu ziah a lang tlat mai. Hla hian mihring rilru a hneh in, ngaihtuahna a kal bingtir em em a, tunlaia hla lar em em Bungzung Kohhran Pavalai Pawl te sak ngei mai – Zoram Pavalaite hla hmang hian i’n thai kawi teh ang.

He hla hian Zoram pum a fan mek a, a hla sak pui a nuam in, rilruah a cham reng mai a, a hla zai tir loh pawhin tlangval chu sawi loh Nula thlengin – Lalpan min ko ta, Zoram Pavalaite tiin kan sa kan sa mai ni. He hla mawi tak hi Pu John Zorammawia phuah niin Bungzung Kohhran Pavalai Pawl te hian mawi tak maiin an sa a. Chhungkaw Pa, patling rualin an han rem dup dup mai chu kan sak rual pui thap thap ta mai ni. A hla hi han en mai hian a Pavalai ngawih ngawih a, a patling ngawih ngawih mai, mahse Mizo thalai tam takin kan tlei pui em em thung si.

A ngaithlatu ten, Pavalai pawl sak tih hre reng tho chungin kan tuipui em em a, changkânna lama hma kan sawn tawh em avangin, Social Media vangin he hla hi mitin phone atangin kan thlirin kan ngaithla thei a, inhmeh lo lam pawh ngaihtuah lovin kan sa kan sa ta mai ni. He hla hi Social Media atanga rawn invawrhchho niin, fiamthu anga lar hluai si, mitin rilruah a cham reng lawi si a, kan sa tawp hlei thei lo chu a nih ber mai hi. Kan tuipui tlat a, Youtube Video-a entu phei chu a ni telin an pung tial tial, he hla rawn lar hluai hi mizo rilrem zawng tak a ni a, a hla hi sakpui a nuam in, a hla thu lam a awl em em a. Hla satliah a nih lohzia a hriat, a ngaithla tam zawk tur anga lang Pavalaite aiin a tuipui zawk thalaite kan ni hlauh thung. Fiamthu angin rawn lar mahse a hla thuin a sawi ang ngei hian Zoram tan hian Pavalai pawl te hi Lalpan zoram siamtha a, Kristian chhungkaw tha tak din turin min duh a ni tih hi hai rual a ni lo.

Pavalai pawl hla kan kurpui a, kan tuipui chiam hi a mak dangdai khawp mai, kan rilruah a cham reng bawk si a. |halai tam zawk ten kan tuipui, kan ngainat zawng nena tehkhin phei chuan a inpersan em em bawk si a. Fiamthu nan mai mai kan hmang emaw kan tih lai hian, thil tak tak ngaihtuah thleng ila, he hla kan sak tawp theih loh chhan ni a lang hi han ngaihtuah tlâng teh ang u. Lalpa hian Zoram siamtha tur hian chhungkaw khaipa te min ko a ni tih a lang chiang hle a ni. Pavalai hla mai mai tih theih a ni lo, kan sak tawp theih loh chhan hi Zoram siam tha a, Kristian chhungkua din thar tur leh a lam kan hawi theih nan harsatna karah pawh Jakoba Pathian chu kan lamah a tangin a hnai reng a ni tih hi hre thar ang u.
He hla hi inhmuhchhuah nan hmang ila a va duhawm tak em! He hla hi Pavalaite tan chauh ni lo, kan dinhmun tawh mek atang te hian Lalpan zoram hi min ko a, a lam hawi turin leh a duhzawng ti a, kan ram a hma aia siamtha turin mitin te min duh a ni tih hi hre thar ang u. A bik takin he hlain a tarlan Pavalai pawla inhmang kher lo chhungkaw pa tin te, chhungkaw tina mipa te tan chona a va ni em. Pathian thuin a sawi ang ngeiin

I Korinth 11:3 :-
Amaherawhchu, mipa tawh phawt lu chu Krista a ni, hmeichhe lu chu mipa a ni, Krista lu chu Pathian a ni tih in hriat ka duh a ni.

Siamtu hian min siam ropuizia kan hriat a ngai, kan chungnun zawkna, hmeichhe lu kan nihzia te leh, kan lu Krista nun mawi tak ang ngei a, kan nun kan hman theuhah hian kan fimkhur a va ngai em. He hla Lalpan min ko ta Zoram Pavalaite tih hi kan tun dinhmun a, kan mamawh em vang a ni ange, kan rilruah a cham reng a, a bik takin hmeichhia hian an tuipui zawk ni mai hian a lang. Pathian thua a inziak ang ngei hian hmeichhe lu kan nihna hi hriatreng a, Lalpa duhzawng taka nun kan hman theih nan, Lalpa min koh lai hian amah hnaih i tum ang u.

He hla hi ngaithla liam mai lovin, he hla hian Zoram mipa te harh a hun tawh zia te, Chawltui ningzu ringawt buaipui a hun tawh lohzia te, kan nupui, kan fanaute rilru kan tihnat tam zawhzia te, kan khawsak leh nungchang put in a zir loh avanga hmeichhe awm nem zawk kan hliam fo te hi a va hun tawh lo em. Lalpan min koh lai hian tangrual ila, Lalpan min ko ta Zoram Pavalaite tih chham satliah mai lovin, keini pawhin Lalpan a koh mek Zoram Pavalaite hi theihtawpin tawngtaipui ila, Kristian Chhungkua kan din theih nan Jakoba Pathian hi min tanpui turin i ko tlâng ang u hmiang.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy