By Zuala
Aizawl
Mizoram Politics vir vel thlir hian Party inbeihna a nasa hle mai a. Party lian pahnih, MNF leh Congress chauh inbeihna kara awm thin kan ni a. Congress kan nin hnuah a thlakna tur MNF kan vote leh mai ni in a lang. Tunah erawh Party thar, naupangte, member pawh tlemte neiin ZPM an rawn piang ve ta a, Zoram Politics History ah chuan chhinchhiah tlak tak a ni. Chutihrual erawh chuan a party naupang ber hi beih tawk nasa ber an ni lawi a. Hei hi a chhan ni awma lang chu an CM Candidate, Pu Duhoma vang hi a ni ta berin a lang. A ni lah taka, Pu Duhoma hi party thlak zing tak a ni reuh a, tin, Zin loh Bill chungchang nen hian an beihna ber a ni mek a. Amaherawhchu, aman a sawi dan takah, a rilru ang pumi, a party awm tawhnaah an awm loh avangin a chhuak zel a, ram a hmangaih vanga chhuak niin a insawi. Hei hi a dik chiahah ka ngai a, hotu nih chak, lal chak ni sela chuan Party lian pahnihte ah hian hotu chan a chang daih tawhin ka ring. Tin, zin loh bill pek let chungchangah pawh hian, a pe let ve duh lo ho sawilang duh miahlova, a pe let awm chhun Pu Duha, heti taka beihna a tawk hi hriatthiam chu a har ve deuh. Chutihrual chuan, MNF leh Congress te pawhin Pu Duha an beihna, kum engemaw zat an beihna chu, Zin loh Bill leh Zuang lawr tih zawng hi a ni. Mipui sum a eiru, unaute sum a kawl, Fund a hmang tha lo, a hmang diklo, tih lampang hi beihna tur thar hi an la hmuchhuak lo hi Pu Duha tan leh ZPM tan chuan lawmna tur a ni ang. Chupawh chu a sawt vak lo emaw ni tih turin Pu Duha leh Pu Sapa inkarah hem thlak tumin, inngeihlo anga lantir tumin MNF leh Congress facebooker ten an post chamchi a, chutianga Pu Duha leh Pu Sapa inkar leh ZPM buai anga chhuah tute party han en ila, Assembly Speaker USA zin boruak kan hria a, Congress lah Treasurer ban hial ngai khawpin an Leader Administration ah a lo fail leh bawk si, Secretary-a ruat an tumnaah lah Treasurer bangta in a lo duh lo leh ni awm a ni.
Kum 40 dawn State puitling kan ni ve ta a, Kum tam zawk hi MNF leh Congress kaihhruaina hnuaia awm kan ni. MNF leh Congress – te hian ram rotling leh rohlu – Damdawiin, Airport, Kawng, Ei leh in, Phullem phah bakah thil hrang hrangah hna ropui tak tak an lo thawk tawh thin a, sawi nep thei a ni lo. Chutihrual erawh chuan, kan Budget leh Project kaltlanga kan sum hmuh ngaihtuah chuan, hei aia tha hian ram a kaihhruai theih ang a, tih hi ka rindan a ni. Tawite i han sawi zui ang hmiang :-
1) Ramri avangin kan buai em em a, lirthei pawh kal ngam loh khawpa buaina kan tawhin Petrol Stock – na tur Oil Depot pawh kan lo la nei lo a ni awm a, Oil ah kan buai nasat thin zia kha mita hmutu kan ni vek ang. Sorkar fail vang a ni.
2) Ramri a buai a, chawhmel ilo a lo lut thei lova, thlai a to phah a, phai atanga mamawh lak luh sa dawrkaiten an ti to nghal a. Mizo lo neituten Mizoram khamkhawp kan lo la thawkchhuak reng reng lote kha Sorkar kaltawh te thiamloh a ni. Hah taka, a sur asa hnuaia thlai thartute aiin Aizawl leh khawpui danga a la chhawngtute an hlawk zawk a, a thawkchhuak tak tak tu, thingtlang lonei mite hlep let an hlep thei tlat. Hei hi a bul ber chu, Local Market control-tu kan neih loh avang leh thlai thar hralhna tur market kan neih loh vang a ni. Dik tak chuan kan Mizo lo neitute hi kan sorkar kal tawhten ngaihsak ni se, thlaiah na na na hi chuan kan intodelh ang a, Phai atanga lak luh kan ngai lovang.
3) Agriculture lamah hian mithiam tak tak kan nei a, mah se, kumtin hmun hran hrana lo neih ti reh tur hian an la thiam tlat lo! Mizoram hi thlalerah kan la chantir thuai ang tih hi ka ringhlel lo. Mi ram kan thlir chuan, tlangram pawh nise, terracing system hmangin, kumtin ramngaw ti chereu lova buh leh bal tharchhuah dan an thiam em em tawh a, keini erawh Lengpui thlawhna thlawk tibuai khawpin kumtin ram kan la hal a ni. Sorkar mahin, chumi hma chuan lo hal zawh vek tur a ni, tiin order a siam a lawm mawle! Kan kalphung hi chu kan thlak mai dawnin a lang lo. Tun atanga kum 10 a ral meuh chuan ramngaw tihtur pawh kan nei tawh lovang. Phai khawlum ang maiin khawlum hi kan tuar tawhin a rinawm.
4) Party Worker tam tak ten hmasawn nia an inngaihna hrang hrang heng – Lungrem, Step siam, Zun in siam, Hall sak tih vel mai mai hi sorkar fakna atan an la hmang reng a. Heng hi hmasawnna tluantling a ni lova, eng sorkar pawh lo ding se, an tih tur a ni. Hma kan sawn loh zia chu maw – eng item ah mah kan la intodelh lo !! A zahthlak a sin. Ram changkang ber ber pawh hi a zawng a za in an intodelh vek ngai lo a, a theih loh. Mah se, engemaw tal hralhchhuah, thawnchhuah an neih khan an ram economy a chawisang a, kuthnathawktuten a hlawkna an tel thin a lo ni.
5) “Khelmual tha, Khelmual tha” tia kan auna kha a la rei lo hle mai. Congress hnungzuiin MNF in phullem an rawn phah ve ta nual a. Kan Sports Minister – in hma a la chak bawk a, kan nei tam ta hle mai. Amaherawhchu, he sports (football) infrastruture hian ram economy a chawisang em? Mi rethei leh kuthnathawktute a thleng phak ve em? Tuten nge hmang tangkai, tih hi kan inzawh nawn fo tur a ni ang. Kan Field neih zawng zawngah Phullem hi phah ta vek ila, engah mah intodelh silo ila, retheih chauh kan hmabak a ni dawn tho tho. Phullem hi a tha lo e, kan ti lova, kan phah ang a, kan phah zel ang. Amaherawhchu, mi rethei, kuthnathawk leh lonei mite dinchhuahna ve tur hi eng sorkar mahin a la ngaihtuah chhin ngai lo.
Heng lo pawh hi sawitur atam ang, i duhtawk phawt ila. Retheia min siamtu hi Congress leh MNF sorkar tih loh rual a ni lo. Kan retheih loh hi an hlau em em mai a, kan hausa a nih chuan sorkar kan mamawh dawn lo tih an hre reng mai. Kan retheih chuan, ` 2000, ` 3000 lek lek a lei theih kan la tam dawn a ni. NLUP an ti, NLUP tha mi an ti, NEDP thlengin, MIP an rawn zuar leh, SEDP an rawn zuar leh, hengte hi i ngaihtuah chiang ang u. Sum sem hi vote hmuhna awlsam ber a ni tih hi heng party pahnihte hian an hre tawh lutuk a, sem an zawrh chuan an tling mai. An sem ngei bawk ang, amaherawhchu, a nihna ang hian NLUP, MIP, SEDP, NEDP te hi a hlawhtlinna percent hi a tlem khawpin a rinawm. Mi thenkhat chuan Autorickshow te an lei a, ar te an vulh a, vawkte an vulh a ni maithei a. Chung hmanga intodelh an lo awm a nih chuan a lawmawm tak zet. Amaherawhchu, party-a insawmluhna hmanrua atan leh mipui rilru hruaikawi nana SEM ringawt hmanga party an inzuar hi chu, mipui hi min va han hmusit talh talh ve, tih mai a awl riau a sin!
Tun hnaiah Social Media (Politics Group) a lun hle mai a. MNF fake account facebooker an tam lawr lak a. Congress – ah hian mi 2 vel chu an awm awm e. Zing dar 5 vel atangin nilengin ZPM beihna leh deuhsawh leh sawichhiatna thu post hmuh tur a awm a. Zilhtu an awm lo emaw tih turin tawngkam chhe tak takin ZPM an bei han hmuh chuan, hei hi an politics khelh dan chu a ni ve sia maw! kan lo ti ngawih ngawih thin a ni. Media Department hi party tin hian an nei vek niin alang a. Party pahnihte au hla, Pu Duha chu Facebook CM, Media-ah chauh a CM tih kha a sawngsawhlawt tawh vak lo a ni ngei ang, LMC , Zemabawk leh Leitan lamah chuan an chak ta vek a nih kha. Kha inthlan a Ruling chak ta silo, MNF facebooker ten Facebook lama tan an han la tak tak chu, ZPM hi misual ber, tawngkam chhe ber, inti fel ber ah an chhuah leh ta chuai chuai mai a. Kha inthlan zawh atang khan Ruling Fake Account thar a piang nual mai a, an profile han en pawhin New Member an tam narawh! ZPM beihna tur hrim hrim atana Fake Account siam a ni tih alang chiang reng mai. Mahni account tak tak atang pawhin an party, Ruling party chu an rawn tan ngam tawh lo a nih ber chu!
Hei mai a la ni lo. Congress lam hian Opposition an nih lai hian Ruling hnathawh tha lo te, rorel dik lote hi engvanga sawive ngam lo nge an nih tih hi ka zawhna a ni. Mipui rin dan aw – tuna MNF ang tho hian diklo leh fello takin ro an lo rel ve tawh tlat mai a, chuvangin sawi ve ngam tur niin an inhre lo a ni ber. Chuvangin, party pahnih rorelna ni thin anga kalpui a nih leh theih nan MNF ni lovin ZPM hi an bitum ta char char mai a ni. Opposition (ZPM) in tih tak meuha mahni opposition -te an beihna leh Ruling in heti em em a Opposition (ZPM) an beihna hi Mizoram Politics History – ah a la awm ngai lo.
Tun hnaiah Ruling lam MLA te, AMC Corporator thenkhatten – “La sorkar ve lo party ten Mizoram chu chhe vek angin an sawi thin a, tin, lo sorkar tawh ten eng hna mah an thawk lo” tih tein an sawi ka chhiar a. Heng thu an dawnsawn na hi an facebooker, fake account siamte sawihmuh a nih loh chuan thildang a awm lo. ZPM an sawina vek a ni tih alang reng a. ZPM hian zoram hi chhe vek anga an sawina ka la hmu ve lova, sorkar tawhten engmah an ti lo, tia an sawina ka la hre ve tlat lo. Ruling MLA leh AMC Corporator lam khan a takin Media emaw luhchilh ula, tin, ZPM in chutiang chuan an sawi em, tih finfiah hmasa phawt ula a tha awm mange aw! ZPM hian chutiang an sawina ka hmu lo a, a teh ber chu “Kan Budget dawn tawh leh thawhchhuah tawh en hi chuan hei aia tha deuh hlek hi chiam ram hi a kaihhruai theih a rinawm a, hma pawn kan sawi a rinawm” tih zawng hi a ni. Chhe lailet dera sawi tu ka la hmu ve tlat lo!
Congress hi chu Karnataka inthlan avang khan phur thar viau mah sela, Mizo mipuite hian kan chunga ro an rel dan kha kan la theihnghilh loh avangin kan la ngaidam lo niin LMC inthlanaah te khan a hriat a. Piangthar tir, Kohhran Upate vei em em ang deuh kha an nia. Ram an vei leh tawh em a, an sorkar chhung zawnga Rorelna dik kengkawh theilo khan tunah Rorelna dik leh kalphung dik min kawhhmuh leh mek a. Sem policy pawh an kalpui tawh dawn lo emaw tih laiin, an boruak kang thei silovin “|ang puihna” an han duangchhuak leh a, semah bawk an lut leh a, hei hi chu mipui hmuhsitna a ni.
ZPM pawh, in confi sual ang tih a hlauhawm hle. LMC, Zemabawk ah leh Leitan lama in chetthat avang khan 2023 inthlan hi in cho zek zek tawh a ni mai thei a. Amaherawhchu, in kalphung thar sawi hi in puangzar a nih loh chuan, tunah pawh Party pahnih MLA te pawn an sawichhuak hial a nih kha. In Manifesto leh in Policy hi in sawi uar lova, ram chungchang ringawt in sawi a nih chuan sorkar a la hla mai thei. In Policy, in manifesto hi a chhiar tawh tan chuan ZPM hi belh tlakah an ngai zel a. Thlai thartute tan hlei hlei hian belh in chakawm a sin! Amaherawhchu, mipui hian in kalphung thar hi kan la hre tawk lova, 2023 a tlin in duh chuan, enge in kalphug thar chu tih hi mipui in hrilh mawlh mawlh a ngai ang. Chuti a nih loh chuan, kum 10 sorkar ang zela kan history kal hi thaichhiat a ni lovang a, MNF bawk an sorkar leh ang.
Engpawhnise, kum 40 dawn min kaihruaitute hian min kaihhruai dan an hre tawh lova, an limit an thleng tawh a, hmasawn dan vak an thiam tawh lo a ni tih alang reng. An ni sorkarna hnuaia kan awm chhunga thenawm ramte hmasawn dan ngaihtuahin a rualawh thlak tak zet a ni. Silchar kawng ping hlek se, buai namenin kan buai lova. Kuthnathawktute retheihna ramah kan awm mek a ni. He Mizoram hi i hmangaih ve a nih chuan rilru fim tak nen 2023 inthlanah vote lo thlak ve ang che.