Zoram thlai thar leitu tur nena
indawrtawn theihna hun siam
Mizoram Agricultural Marketing Board, International Fund for Agriculture Development (IFAD) leh Mission Organic Mizoram tangho buatsaih, ‘Mizoram Buyer Seller Meet 2025’ chu Aizawlah neih tan a ni a. District hrang hranga Agriculture Marketing Committee, farmer producer organisation, self help group, entrepreneurs leh ram chhung leh pawn atanga sumdawng company engemawzat an tel.
Meet hawngtu Agriculture & Farmers’ Welfare minister PC Vanlalruata chuan, Mizorama kuthnathawktute tih hmasawn leh an dinhmun chawikanna atan indawrtawnna tha siamsak an nih theihnan Mizoram Agricultural Marketing Board (MAMB) din a ni a. Mizorama thar – sawhthing, aieng, Mizo hmarchate leh hmunphiah pawh hmun zau zawka hralh mek zel a ni tih a sawi.
MAMB hmalakna leh kuthnathawktute thawhrimna a hlawhtlin theihna atana pawimawh chu thlai thar lei chhawngtu tha leh rintlak neih a ni, tiin, chutiang ‘buyer’ tha chu neih tumin Buyer Seller Meet hi buatsaih a ni tih a sawi a ni.
Aizawl chu rel hmanga thlunzawm a nih tawh avangin insumdawntawnna pawh nasa zawka kalpui theih a nih tawh rualin, state dang el pha leh midang aia thlai hrisel, thianghlim leh itawm zawk thar chhuak turin tan lak a ngai tih minister hian a sawi a. Bana Kaih Scheme kaltlangin sawhthing leina atan cheng vaibelchhe 137 hman a ni, tiin, Mizoram sawhthing chu hlo tur tel lo, ‘organic’ taka enkawl a nih avangin ngaihhlut a hlawh chhoh zel a beisei tih a sawi bawk.
Buyer Seller Meet-ah hian state pawn atanga ‘buyer’ inziaklut 40 vel an awm a, Mizorama thar thlai, thei leh a kaihnawih chi hrang hrang phochhuahna stall 50 a awm.
Zoram thlai thar leitu tur nena indawrtawn theihna hun siam
