Daily Newspaper

ZOTAWNG KÂRA SAPTAWNG

14

Zirsangkima

‘Lockdown hmaa walked thîn,’ nia insawi te hi chuan, ‘Ka lehkhabu tûr ka printed-tîr a,’ ti ve mai se; mahse, an ti duh bîk miah si lo a. Ngawi rengin, an lehkhabu edited sâ chu lo chhiar ve mial mial mai teh se!

Kan tawngin thu kan han ziak a, thumal tam tak, kan tawnga dah theih reng chunga sap tawng kan rawlh sek chungchâng sawia inhauh chiam ka tum hauh lo a (hauh tuar nasa tûr ber pawh ka ni hial ta ve ang chu!). Kan thu ziah laia loh theih loha sap tawng kan zeh chânga sap tawng kan hman dân hi i’n bih thuak thuak teh ang.

Tûnlaiah ziak mi kan pung thûr mai. Lehkhabu leh chanchinbu lama thu ziak thînte piah lamah, social media lama thu tha tak tak ziak thîn kan pung ta hi thil lâwmawm tak niin ka hria. Social media kan hman tan tirh lai ai khan tûnah chuan kan thu ziah/chhut pawh kan uluk fê tawh zâwk a; lamtawi (shortcut)-a thu ziah chu ‘thil thing’ a ni ta dêr mai a, thil lâwmawm a ni leh zêl. Chutih rual chuan, loh theih loha saptawng kan zeh a tûl fo mai a. Chûng hunah chuan an ziah dân dik (grammar tense dik) zui ve zêl kan tum hi a fu lo hle; nuih a ti za lek lek hial thei mai!

Entîr nân: ‘Nimina i thu rawn post kha a va tha ve,’ tih mai tûrah, English grammar thiam ber âwm ang hrimin, ‘Nimina i thu rawn posted kha a va tha ve,’ tia ziah chîng kan awm. Hêng mite hian, ‘Ka fapa pawh matric a passed ve a,’ an ti leh peih chuang mang dêr si lo! Social media lama, ‘Lockdown hmaa walked thîn,’ nia insawi te hi chuan, ‘Ka lehkhabu tûr ka printed-tîr a,’ ti ve mai se; mahse, an ti duh bîk miah si lo a. Ngawi rengin, an lehkhabu edited sâ chu lo chhiar ve mial mial mai teh se!

Mizo grammar-a kan inhnial luai luai laia kan thu ziaha sap tawng lo lang ve zauh, a ‘tense’ zawng zawng nêna ziah/chhut dik vek kan tum dâwn chuan, a ziaktu kan buai dâwn. Tin, a chhiartu pawh kan ti buai dâwn bawk a, a buaithlâkin a chhangchhiatthlâk êm mai—i chîng lo vek law law mai ang u. WhatsApp group ‘left’ leh ‘leave’-ah pawh kan la buai chhûng hi chuan an grammar hi zawm ve zêl loh mai tûr. Sap tawngin thu kan ziak loa, kan sawi nahek hleinêm maw le a!

Mizo tawnga thu kan ziak/chhu emaw kan sawi kâr emawa sap tawng kan zep duh a nih chuan, an grammar hi zawm ve zêl a tûl lo e, kan zàwm vek séng dâwn chuang lo … lo thiam pawh ni ila, kei chuan zawm vek tûl ka ti lo khawp mai.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy