ZPM sawrkar thil thar tih ve chu a tha lo lam zel a ni a, an sawi ang lo zela an awm avangin opposition atan an tha ber tih deputy speaker hlui H Biakzauva chuan a sawi.
Zirtawpnia MNF office Mizo Hnam Runa inkhawmah MNF adviser H Biakzuava chuan ZPM chu an opposition laia an insawi ang niloin ruling-ah chuan an lo danglam hle a, opposition atan khan an tha ber tih a sawi a. Sawrkar thla 10 leka upaah chuan mipui sawisel nasat ber tum a la ni tih sawiin, “A chhan chu, tih tura an sawi an tih loh leh, tih loh tur an sawi an tih leh si a, kalphung thar a awm lo. An thil thar tih ve pawh a tha lo lam zel a la ni. Bangla pawh kan la chhuahsan hma hma in an rawn ri nghal bur bur mai a, ka’n zawhchian nak chuan ZPM MLA-te bangla cheitha tur thawm a lo ni a, kalphung thar hi a letlingin a kal mek,” a ti.
ZPM sawrkar chu a hriat ve chinah rualkhailo ber leh chhim lam ngaihsak dertu awmchhun a ni tih MNF hruaitu hian sawiin, chhimlam MLA te chanvo pawimawh chang tura ‘fit lo’ leh a ngaihna hre lo hlir em ni an nih, tiin a zawt.
Mi chetchhiat changa phul luai ai chuan mar pata tan lak a pawimawh tih MNF hruaitu hian a sawi a. Tumah sawrkar reng tur an awmlo ang bawkin, tupawh sawrkar thei vek an ni a. An sawrkar laia an tihsualte inpawm a, insiamtha in, sawrkar leh tura tan lak zel a tul tih a sawi bawk.
ZPM chu eptu atan an tha ber – H Biakzauva
